अशोक खरात प्रकरणातील सर्वात मोठा खुलासा, रुग्ण म्हणून गेला अन् डॉक्टरलाच…

भोंदूगिरी आणि अघोरी कृत्यांच्या आरोपाखाली अटकेत असलेला भोंदूबाबा अशोक खरात याच्या अडचणीत दिवसेंदिवस वाढ होताना दिसत आहे. याप्रकरणी नाशिक पोलीस, एसआयटीकडून सखोल चौकशी सुरु आहे. या चौकशीदरम्यान मोठमोठे खुलासे समोर येताना पाहायला मिळत आहे. आता अशोक खरातबद्दल एक मोठी माहिती समोर आली आहे. अशोक खरातला पोटाचा गंभीर विकार होता. याच आजाराचा शस्त्र म्हणून वापर करून त्याने आपले नेटवर्क मजबूत केल्याची धक्कादायक माहिती समोर आली आहे. या प्रकरणात नाशिकमधील नामवंत शिवनिका संस्थेचे विश्वस्त डॉ. नंदकिशोर कातोरे यांचे नाव समोर आल्याने वैद्यकीय आणि सामाजिक क्षेत्रात मोठी खळबळ उडाली आहे.

आजाराच्या बहाण्याने जवळीक

मिळालेल्या माहितीनुसार, अशोक खरात हा पोटाच्या तीव्र त्रासामुळे त्रस्त होता. याच उपचारासाठी त्याने डॉ. नंदकिशोर कातोरे यांची भेट घेतली होती. डॉ. कातोरे यांनी खरातवर दोन वेळा उपचार केले. मात्र, रुग्ण म्हणून आलेला अशोक खरात केवळ उपचारापुरता मर्यादित राहिला नाही. अशोक खरात हा त्यांच्याकडून उपचार घेत असतानाच त्याने आपल्या भोंदूगिरीची भुरळ डॉक्टरांना घातली. त्यानंतर त्यांच्याशी जवळीक साधली.

रुग्ण ते विश्वस्त: संशयास्पद प्रवास

अशोक खरातने डॉक्टरांशी असलेल्या ओळखीचा फायदा घेत त्यांना शिवनिका संस्थेच्या विश्वस्त पदासाठी गळ घातली. एका रुग्णाच्या सांगण्यावरून डॉक्टर थेट संस्थेचे विश्वस्त कसे बनले? आणि यामागे खरातचा कोणता मोठा डाव होता? याचा शोध आता विशेष तपास पथक (SIT) घेत आहे. खरातने आपल्या आजाराचे भांडवल करून डॉक्टरांना भावनिक साद घातली की त्यांना अघोरी विद्येच्या जाळ्यात ओढले, याचाही तपास सध्या केला जात आहे.

SIT च्या तपासाकडे सर्वांचे लक्ष

अशोक खरातच्या पोटाच्या आजाराचे नेमके स्वरूप काय होते? त्याने या आजाराचा वापर करून आणखी किती बड्या व्यक्तींना आपल्या जाळ्यात ओढले आहे? असे अनेक प्रश्न आता उपस्थित होत आहेत. SIT च्या चौकशीत डॉ. कातोरे आणि खरात यांच्यातील आर्थिक व्यवहारांचीही तपासणी होण्याची शक्यता वर्तवली जात आहे. या प्रकरणातून नाशिकमधील भोंदूगिरीचे मोठे रॅकेट उघडकीस येण्याची शक्यता वर्तवण्यात येत आहे.