Aurangabad Fire | धावत्या बसखाली अचानक दुचाकी घुसली, एसटीने क्षणात घेतला पेट, प्रवासी बचावले, दुचाकीस्वार जखमी

औरंगाबादः एकिकडे दौलताबाद किल्ला परिसरात (Daulatabad fire) शुक्रवारी दुपारी आगीचे लोळ उठत होते तर वैजापूर (Vaijapur) तालुक्यातही एक भीषण घटना घडली. राज्य परिवहन महामंडळाच्या बसखाली अचानक दुचाकी आल्याने बसला भीषण आग लागली. दहा-पंधरा मिनिटातच या बसने पेट घेतला. संपूर्ण बस आगीच्या (ST Bus Fire) भक्ष्यस्थानी पडली. सुदैवाने बसमधील प्रवाशांना वेगाने बाहेर काढण्यात आले. मात्र आगीच्या तडाख्यात संपूर्ण एसटी आणि बसखाली आलेली दुचाकी जळून खाक झाली. या अपघातात दुचाकस्वार संजय गायकवाड हे दुचाकीस्वार गंभीर जखमी झाले आहेत. त्यांच्यावर रुग्णालयात उपचार सुरु आहेत. तर बसचे चालक आणि वाहकही सुखरूप आहेत.

काय घडली नेमकी घटना?

वैजापूर आगाराची वैजापूर-कन्नड ही एसटी चालक के जी ठुपके आणि वाहक अनिल पवार हे दोघे चालवत होते. कन्नड येथून दुपारी चार वाजेच्या सुमारास रोटेगाव रेल्वेस्टेशनच्या उड्डाणपुलावर बसच्या पुढील चाकाखाली दुचाकी फरफटत घुसली. चालकाने प्रसंगावधान राखून बस रस्त्याच्या कडेला उभी केली. बसमधील प्रवाशांना बाहेर काढण्यात आले. यात भाजप युवा मोर्चाचे केतन आव्हाळे, बाजार समितीचे सभापती भागीनाथ मगर, संतोष बंगाळ, अक्षय बंगाळ, मनोज गाढे यांच्यासह परिसरातील नागरिकांनी बसकडे धाव घेतली. प्रवाशांना त्यांनी सुरक्षितपणे खाली उतरवून घेतले.

प्रवासी बचावले, दुचाकीस्वार जखमी

वैजापूर शहरापासून अवघ्या तीन किलोमीटर अंतरावरील रस्त्यावर दुपारी हे अग्नितांडव घडले. अखेर अग्निशमन दलाच्या जवानांनी ही आग विझवली. मात्र आग डिझेलच्या टाकीपर्यंत गेली असती तर मोठा स्फोट झाला असता. त्यामुळे नागरिकांना खूप दूर अंतरावर उभे रहाण्याचे आवाहन करण्यात आले होते. या बसमधील 17 प्रवासी सुखरुप असून बसखाली आलेले दुचाकीस्वार मात्र गंभीर जखमी आहेत. त्यांच्यावर घाटी रुग्णालयात उपचार सुरु आहेत.

इतर बातम्या-

Nagpur | कोरोनात 100 पेक्षा जास्त बालविवाह झाल्याची शक्यता! 17 बालविवाह बालकल्याण विभागाने रोखले

Cotton Crop : पुन्हा पांढऱ्या सोन्याने बहरणार शिवार, घटलेले क्षेत्र कशामुळे वाढणार?