मस्साजोगमधील सरपंच हत्या प्रकरणाचा गुंता वाढला, आरोपीला भेटला संतोष देशमुखांचा भाऊ?आणखी एक CCTV फुटेज समोर

बीडच्या केज तालुक्यातील मस्साजोग गावचे सरपंच संतोष देशमुख यांच्या हत्या प्रकरणातील दुसरा सीसीटीव्ही फुटेजचा व्हिडिओ ‘टीव्ही 9 मराठी’च्या हाती लागला आहे. या सीसीटीव्ही फुटेजमध्ये पीएसआय राजेश पाटील, आरोपी सुदर्शन घुले आणि मयत संतोष देशमुख यांचा भाऊ धनंजय देशमुख हे एकत्र एकाच टेबलवर समोरासमोर बसले असल्याचं दिसत आहे. विशेष म्हणजे पहिल्या व्हिडिओत आणि दुसऱ्या व्हिडिओत केवळ 4 मिनिटांचा अंतर आहे. त्यामुळे या प्रकरणाचा गुंता आणखी वाढल्याची चर्चा आहे. पोलीस या प्रकरणाचा सखोल तपास करत आहेत. पण नेमकं काय घडलं आहे? पीएसआय राजेश पाटील, आरोपी सुदर्शन घुले आणि धनंजय देशमुख नेमके का भेटले? असे प्रश्न आता उपस्थित होत आहेत.

मस्साजोग येथील संतोष देशमुख हत्या प्रकरणात पीएसआय राजेश पाटील आणि आरोपी सुदर्शन घुले यांचा केज शहरातील बसंत बिहार या उडपी हॉटेलमधला सीसीटीव्ही फुटेजचा व्हिडिओ समोर आल्यानंतर, आता दुसरा सीसीटीव्ही फुटेजचा व्हिडिओ समोर आला आहे. ज्यामध्ये पीएसआय राजेश पाटील, आरोपी सुदर्शन घुले आणि मयत संतोष देशमुख यांचा भाऊ धनंजय देशमुख हा देखील त्या दोघांसोबत चर्चा करत आहे.

पहिल्या व्हिडिओमध्ये आणि या व्हिडिओमध्ये अवघ्या 4 मिनिटांचा अंतर आहे. दरम्यान आता हा सीसीटीव्ही फुटेजचा व्हिडिओ सोशल मीडियावर व्हायरल झाला आहे. त्यामुळे या प्रकरणाचा गुंता आणखी वाढला आहे. आरोपी आणि पोलीस अधिकाऱ्यासोबत सरपंच संतोष देशमुख यांचे बंधू धनंजय देशमुख हे चर्चा करताना दिसत असल्याने या संपूर्ण प्रकरणावर प्रश्नचिन्हं उपस्थित होत आहेत.

रोहित पवारांनी घेतली संतोष देशमुखांच्या कुटुंबियांची भेट

दरम्यान, राष्ट्रवादी काँग्रेस शरद पवार गटाचे आमदार रोहित पवार यांनी आज मस्साजोग गावात जावून संतोष देशमुख यांच्या कुटुंबियांची भेट घेतली आहे. त्यांनी घटनेवर प्रतिक्रिया दिली. “अतिशय भीतीदायक आणि अमानवीय घटना संतोष देशमुख यांच्यासोबत 9 तारखेला घडली. या घटनेत मोठ्या लोकांचा हात आहे. हे सामान्य लोकांना देखील पटलेले आहे. वाल्मिक कराड यांच्या विरोधात पवनचक्की प्रकल्पावर खंडणी मागितल्याचा गुन्हा दाखल झाला आहे. यात मास्टरमाईंड हा वाल्मिक कराड आहे. वाल्मिक कराड याला लवकरात लवकर अटक केली पाहिजे”, अशी मागणी रोहित पवार यांनी केली.