मोठी बातमी! महाविकास आघाडीच्या बैठकीला 24 आमदारांची दांडी, बड्या नेत्यांचाही समावेश

राज्याच्या राजकारणात गेल्या काही काळापासून घडामोडींना वेग आला आहे. काहीच दिवसांपूर्वी शिवसेना उद्धव बाळासाहेब ठाकरे पक्षाचे 6 खासदार फुटले असून त्यांनी एकनाथ शिंदे यांच्या शिवसेनेत प्रवेश केला आहे. अशातच आज महाविकास आघाडीच्या आमदारांची बैठक बोलावण्यात आली होती. या बैठकीला तब्बल 24 आमदारांनी दांडी मारल्याची माहिती समोर आली आहे. यातील काही आमदारांची नावेही समोर आली आहेत. यात काही बड्या नेत्यांचाही समावेश आहे. त्यामुळे वेगवेगळ्या राजकीय चर्चांना सुरुवात झाली आहे. याबाबत सविस्तर माहिती जाणून घेऊयात.

24 आमदारांची दांडी

महाविकास आघाडीच्या एकूण 59 आमदारांपैकी 35 आमदार आजच्या बैठकीला उपस्थित होते. तर 24 आमदारांनी या बैठकीला दांडी मारली आहे. बैठकीला गैरहजर असणाऱ्या आमदारांमध्ये नाना पटोले, विजय वडेट्टीवार, विश्वजीत कदम, अमित देशमुख, रोहित पवार, अभिजीत पाटील, विकास ठाकरे, संदीप क्षीरसागर, जयंत पाटील या बड्या नेत्यांचा समावेश आहे. या आमदारांच्या अनुपस्थितीचे कारण अद्याप समोर आलेले नाही. त्यामुळे राजकारणात खळबळ उडाली आहे.

शरद पवार-जयंत पाटील गैरहजर

उद्धव ठाकरे, संजय राऊत आणि हर्षवर्धन सपकाळ यांच्या नेतृत्वात ही बैठक पार पडली. सुरुवातीला शरद पवार या बैठकीला हजर राहणार असल्याची माहिती समोर आली होती, मात्र शरद पवार आणि जयंत पाटील आपल्या वैयक्तिक कारणामुळे गैरहजर असल्याची माहिती समोर आली आहे. तसेच काँग्रेस विधिमंडळ नेते विजय वडेट्टीवार हे प्रकृती अस्वास्थ्यामुळे महाविकास आघाडीच्या बैठकीला उपस्थित राहू शकले नाहीत अशी माहितीही समोर आली आहे.

या बड्या नेत्यांची हजेरी

समोर आलेल्या माहितीनुसार आजच्या महाविकास आघाडीच्या बैठकीला संजय राऊत, अंबादास दानवे, बाळा नर, हरून खान, महेश सावंत, विकास ठाकरे, ज्योती गायकवाड, नितीन राऊत, आदित्य ठाकरे, वरून सरदेसाई यांच्यासह तब्बल 35 नेत्यांनी हजेरी लावली. शिवसेनेमधून सहा खासदार फुटल्यानंतर या बैठकीला वेगळं महत्त्व आले होते. या अधिवेशनामध्ये सरकारला कोणत्या विषयावरती घेरायचे. याबाबत चर्चा झाल्याची माहिती समोर आली आहे.