मोठी बातमी! ठाकरेंना मोठा धक्का, माजी खासदार अजितदादा गटाच्या संपर्कात? राज्यसभेसाठी मोठी लॉबिंग; पडद्यामागे मोठ्या घडामोडींना वेग
NCP Rajya Sabha -Uddhav Thackeray: राजकीय गोटातून एक खळबळजनक बातमी समोर येत आहे. राज्यसभेच्या जागेसाठी नवीन समीकरणाची नांदी समोर येत आहे. राष्ट्रवादी काँग्रेस ठाकरे सेनेच्या माजी खासदाराला संधी देण्याची चर्चा होत आहे. काय आहे ही मोठी अपडेट?
NCP Rajya Sabha -Uddhav Thackeray: राजकारणात केव्हा काय होईल हे सांगता येत नाही. राष्ट्रवादी काँग्रेसच्या राज्यसभेच्या जागेवर कुणाची वर्णी लागणार याची जोरदार चर्चा सुरू असतानाच एक मोठा ट्विस्ट आला आहे. राज्यसभेच्या जागेसाठी राष्ट्रवादीकडे इच्छुकांची रीघ लागली आहे. त्यात इतर पक्षातील नेत्यांचाही विचार होत असल्याचे समोर येत आहे. नवनीत राणा यांचे नाव मागे पडले असतानाच आता उद्धव ठाकरे यांच्या शिवसेनेला धडकी भरवणारी अपडेट समोर येत आहे. पक्षाकडे ठाकरेंच्या एका माजी खासदाराकडून देखील उमेदवारी मिळवण्यासाठी प्रयत्न करत असल्याचे समजते. उमेदवारी अर्ज भरण्यासाठी दोन दिवस शिल्लक आहेत, पडद्यामागे जोरदार लॉबिंग सुरू आहे. आता राज्यसभेचे तिकीट नेमकं कुणाला मिळते याकडे सर्वांचे लक्ष लागले आहे.
अद्यापही उमेदवार नाही निश्चित
राज्यसभेसाठी उमेदवारी अर्ज भरायला आता केवळ २ दिवस बाकी आहेत. राष्ट्रवादी काँग्रेस पक्षाचा अद्याप राज्यसभेचा उमेदवार निश्चित झालेला नाही. राष्ट्रवादी काँग्रेस पक्षात सध्या राज्यसभेसाठी मंत्री छगन भुजबळ इच्छुक आहेत. तर इतर नेत्यांची नावं सुद्धा स्पर्धेत आहेत. त्यात प्रमोद हिंदुराव,अविनाश आदिक,समीर भुजबळ यांची नाव चर्चेत आहेत. आता यापैकी कुणाच्या गळ्यात राज्यसभेची उमेदवारीची माळ पडते हा चर्चेचा विषय आहे. तर पक्षाबाहेर एखाद्याला उमेदवारी देण्यात येईल का, यावर सुद्धा खल सुरू असल्याचे समजते.
नवनीत राणा यांच्या नावाचा विचार?
तर सूत्रांनी दिलेल्या माहितीनुसार, पक्षाकडून माजी खासदार नवनीत राणा यांच्याशी संपर्क साधून उमेदवारी घेण्याची विनंती करण्यात आली होती. नवनीत राणा यांच्याकडून विचारधारेची अडचण लक्षात घेत उमेदवारी घेण्यास नकार दिल्याचे समजते. परवा राणा दाम्पत्याने मुख्यमंत्री देवेंद्र फडणवीस आणि उपमुख्यमंत्री सुनेत्रा पवार यांची भेट घेतली होती.
ठाकरेंचा माजी खासदार इच्छुक
तर अजून एक ट्विस्ट समोर आला आहे. राज्यसभेसाठी उद्धव ठाकरे यांच्या शिवसेनेचा एक माजी खासदार इच्छुक असल्याचे समोर येत आहे. पण राष्ट्रवादीकडून या माजी खासदाराला अपेक्षित प्रतिसाद मिळाला नसल्याची माहिती समोर येत आहे. आता ठाकरेंचा हा माजी खासदार कोण याची चर्चा रंगली आहे. उद्या राष्ट्रवादी काँग्रेस पक्षाचे प्रमुख नेते मुंबईत एकत्रित बसून अंतिम निर्णय घेणार असल्याची माहिती सूत्रांनी दिली.
