‘इंडिया आघाडीची बैठक नव्हे हे तर’… भाजप खासदाराने उडवली खिल्ली

अहमदनगर : 30 ऑगस्ट 2023 | देशातील २६ प्रमुख पक्षांची INDIA आघाडीची मुंबईत तिसरी बैठक होत आहे. INDIA आघाडीच्या बैठकीसाठी प्रमुख पक्षांचे नेते मुंबईत दाखल होत आहेत. मात्र, मुंबईत येणाऱ्या या नेत्यांची भाजप खासदार सुजय विखे पाटील यांनी खिल्ली उडविली. मुंबईत गेट वे ऑफ इंडिया, समुद्राचे वारं आणि रात्री उद्धव ठाकरे यांच्याकडे पुरणपोळी. असा त्यांचा बेत आहे. हे सगळे पर्यटन असून देशाच्या पर्यटनाला गती देण्याचे काम INDIA आघाडीचे लोक करत आहेत अशी टीका त्यांनी केली.

छोट्या गोष्टींवर चर्चा कशाला?

राज्य मंत्रीमंडळाच्या पायाभूत सुविधा समितीतून भाजपचे मंत्री राधाकृष्ण विखे पाटील यांना वगळण्यात आले. त्यांच्या जागी राष्ट्रवादीचे दिलीप वळसे पाटील यांचा समावेश करण्यात आला आहे. त्यावर बोलताना सुजय विखे म्हणाले, ‘आठ सीटर गाडी असली तर कुणीतरी उतरल्याशिवाय कुणी त्यात बसू शकत नाही.’

‘भाजपने राधाकृष्ण विखे पाटील यांना मोठा मानसन्मान आणि मंत्रिपद दिले आहे. त्यामुळे छोट्या गोष्टींवर चर्चा कशाला? हा फार मोठा विषय नाही. पक्षाचा आदेश अंतिम असतो. आम्ही तीन पक्ष म्हणजे एक कुटुंब आहोत. ते समितीत असल्याचे मला माहीत नव्हते आज बातम्या ऐकून ही माहिती कळली’, असे ते म्हणाले.

कारखान्याची अडचण आता तरी दुर व्हावी

राज्यात दुष्काळाची परिस्थिती आहे. ते पाहूनच अजितदादा यांनी तो निर्णय घेतला होता. राज्यशासन फक्त कर्जाची हमी देते, पैसे देत नाही. कर्ज एनसिडीसीच्या माध्यमातून केंद्र सरकार उपलब्ध करून देते. अडचणीत असलेले कारखाने योगायोगाने भाजपच्या लोकांचे आहेत. मविआने तीन वर्षे अन्याय केला म्हणून आम्ही अडचणीत आलो होतो. पण, गेल्या तीन वर्षांची अडचण आता तरी दूर व्हावी यासाठी काम चालू आहे. यात कुठलाही पक्षपातीपणा होणार नाही, असे सुजय विखे पाटील यांनी सांगितले.

लोकसभेत गडाख – विखे सामना?

आगामी लोकसभा निवडणुकीत शिर्डी आणि अहमदनगर लोकसभेत जो मोदींजींचा फोटो वापरेल तोच खासदार होणार ही काळ्या दगडावरची पांढरी रेष आहे. येथे उद्धव ठाकरे उमेदवार देणार असतील तर त्यांना माझ्या शुभेच्छा. उद्धव ठाकरे यांना सर्व ठिकाणी जागा देण्याचा अधिकार आहे. पण, भाजपच्या केंद्रीय निवडणूक समितीने अद्याप तिकीट जाहीर केले नाही. त्यामुळे कुणासोबत सामना होणार हे माझे तिकीट फायनल झाल्यावरच ठरेल असे त्यांनी सांगितले.