चर्चा शिवसेना प्रवेशाची, पण रवींद्र धंगेकरांना आता या बड्या पक्षाकडून थेट ऑफर!
रवींद्र धंगेकर हे शिवसेनेत प्रवेश करणार असल्याची चर्चा गेल्या काही दिवसांपासून सुरू आहे, मी काँग्रेसमध्येच राहणार असल्याचं त्यांनी स्पष्ट केलं आहे, मात्र त्यातच आता त्यांना आणखी एका पक्षाकडून पक्षप्रवेशाची ऑफर देण्यात आली आहे.
काँग्रेसचे नेते रवींद्र धंगेकर हे शिवसेनेत प्रवेश करणार असल्याची चर्चा गेल्या काही दिवसांपासून सुरू आहे, मात्र त्यांनी या चर्चेचं खंडण करत ही शक्यता फेटाळून लावली आहे. असं असतानाच त्यांना आता आणखी एका पक्षाकडून पक्षात येण्याची खुली ऑफर देण्यात आली आहे. राष्ट्रवादीच्या नेत्या रुपाली पाटील यांनी रवींद्र धंगेकर यांना राष्ट्रवादीत प्रवेश करण्याची ऑफर दिली आहे. त्यामुळे पुन्हा एकदा आता राजकीय वर्तुळात चर्चेला उधाण आलं आहे.
नेमकं काय म्हणाल्या रुपाली पाटील?
रवी भाऊ आपण हाडाचे कार्यकर्ते, सक्षम लोकप्रतिनिधी आहात. निवडणुकीत हार जीत चालतच असते. पण नेतृत्व, कामाची पद्धत थांबत नसते. भाऊ तुमच्या सोबत काम केले आहेच. काही दिवसांपासून बातमी येत आहे, दुसऱ्या पक्षात प्रवेश करणार आहात. कार्यकर्त्यांची बैठक घेणार आहात, कुठे प्रवेश करायचा या संदर्भात चर्चा विनिमय करणार आहात. रवी भाऊ अजित दादांचे आणि तुमचे संबंध नेहमीच चांगले आहे, ते तुम्ही अनुभवले आहे. तुमच्यासारखा काम करणारा, सक्षम, सर्वांना एकत्रित घेऊन काम करणाऱ्या हाडाच्या कार्यकर्त्याने, लोकप्रतिनिधीने नक्की एकदा राष्ट्रवादी काँग्रेस पार्टीचा विचार करावा अशी कार्यकर्ता बहीण म्हणून विनंती करते, बाकी पक्ष वेगळे असले तरी हाडाचे कार्यकर्ते, काम करणारे सक्षम लोकप्रतिनिधी बहीण भाऊ हे नाते कायम आहेच. असं पाटील यांनी म्हटलं आहे.
दरम्यान काही दिवसांपूर्वी कामानिमित्त अजित पवार यांना भेटून आल्याची माहिती स्वत: रवीद्र धंगेकर यांनी प्रसारमाध्यमांना दिली होती. शिवसेनेत प्रवेश करणार असल्याच्या चर्चा सुरु असताना आता रवींद्र धंगेकर यांना राष्ट्रवादीने सुद्धा खुली ऑफर दिली आहे, यामुळे आता रवींद्र धंगेकर नक्की काय निर्णय घेणार याकडं सर्वांचं लक्ष लागलं आहे. रवींद्र धंगेकर उद्या किंवा परवा आपल्या कार्यकर्त्यांसोबत बैठक घेऊन राजकारणाची पुढील दिशा ठरवणार आहेत, त्यापूर्वीच शिवसेना आणि राष्ट्रवादी काँग्रेसने रवींद्र धंगेकर यांना ऑफर दिली आहे.
