महापालिकेत चक्क नमाज पठण! नाशिकमध्ये खळबळ, प्रकरण काय?

मालेगाव: हिरा ढाकणे, प्रतिनिधी| मालेगाव महानगरपालिका पुन्हा एकदा वादाच्या केंद्रस्थानी आली आहे. यापूर्वी उपमहापौर शान-ए-हिंद यांनी कार्यालयात टिपू सुलतान यांचा फोटो लावल्याने राज्यभरात खळबळ उडाली होती. आता महापालिकेच्या विद्युत विभागात सामुदायिक नमाज पठण केल्याचा व्हिडीओ सोशल मीडियावर व्हायरल झाल्याने नवीन वाद निर्माण झाला आहे. या प्रकरणी पोलिसांनी मोठी कारवाई केली आहे. पोलिसांनी सात जणांविरुद्ध एफआयआर दाखल केला आहे.

प्रकरण काय आहे?

मालेगावच्या प्रभाग ४ (किंवा काही रिपोर्ट्सनुसार प्रभाग १५) मधील पवारवाडी परिसरात रस्त्यावरील पथदीप (स्ट्रीट लाइट्स) सुरू करण्याची मागणी स्थानिक नागरिक गेल्या अनेक दिवसांपासून करत होते. वारंवार निवेदने देऊनही महापालिका प्रशासनाकडून कोणतीही कारवाई झाली नाही. यामुळे संतप्त झालेल्या नागरिकांनी लोकसंघर्ष समितीचे अध्यक्ष लुकमान कमाल यांच्या नेतृत्वाखाली महापालिकेच्या विद्युत विभागात ठिय्या आंदोलन सुरू केले.

आंदोलक अधिकारी येण्याची वाट पाहत बसले असताना, विद्युत विभागातील अधिकारी बैठकीचे कारण सांगून बाहेर गेले आणि बराच वेळ परत आले नाहीत. याच वेळी नमाजची वेळ झाली होती. सध्या रमजानचा पवित्र महिना सुरू असल्याने आणि आंदोलनामुळे बाहेर जाणे शक्य नसल्याने, आंदोलकांनी कार्यालयातच जाजम पसरवून सामुदायिक नमाज पठण केले. नमाजचा व्हिडीओ रेकॉर्ड करून सोशल मीडियावर अपलोड करण्यात आला, जो प्रचंड व्हायरल झाला आहे. सरकारी कार्यालयात धार्मिक विधी पार पाडल्याने प्रशासकीय आणि राजकीय वर्तुळात मोठी खळबळ उडाली आहे.

या प्रकरणी पोलिसांनी केली कारवाई

पोलिसांच्या म्हणण्यानुसार, या प्रकरणात सात जणांविरुद्ध एफआयआर दाखल केला आहे. भातीय दंड संहिता (आयपीसी)च्या कलम १३२, १८९(२), १९० आणि २९२ (सरकारी सेवकावर हल्ला, बेकायदेशीर सभा आणि संबंधित तरतुदी) अंतर्गत गुन्हा दाखल करण्यात आला आहे. महाराष्ट्र पोलीस कायद्याच्या कलम ३७(१), ३७(३) आणि १३५ अंतर्गतही कारवाई करण्यात आली आहे. पोलिसांचे म्हणणे आहे की महानगरपालिका कार्यालयात अनधिकृतपणे जमून नमाज पठण केल्याच्या घटनेचा तपास सुरू आहे. आरोपींची ओळख पटली आहे आणि पुढील कायदेशीर कारवाई सुरू आहे असे देखील सांगण्यात आले आहे.