पंढरपुरात व्हिआपी दर्शनावरून दुजाभाव? शिवसेना नेत्यासोबत आलेल्या लोकांना थेट दर्शन तर भाजप नेत्याच्या कुटुंबाला ताटकळत ठेवलं

आषाढी यात्रेच्या पार्श्वभूमीवर आजपासून पंढरपूरमधील श्री विठ्ठल आणि रखुमाई मातेचे व्हिआपी दर्शन बंद करण्यात आले आहे. यासंदर्भात सोलापूरचे जिल्हाधिकारी एस. कार्तिकेयन यांनी आदेश दिला आहे. या काळात वरिष्ठ शासकीय अधिकारी, मंदिर समितेचे सदस्य तसेच लोकप्रतिनिधी यांचे शिफारस पत्र किंवा इतर कुठल्याही मार्गाने कोणालाही व्हिआपी दर्शनासाठी प्रवेश दिला जाणार नाही, असं स्पष्ट करण्यात आलं आहे. परंतु व्हिआयपी दर्शन बंद केल्याच्या पहिल्या दिवशी  पंढरपुरात व्हीआयपी दर्शनाचा फज्जा उडाल्याचं पहायला मिळालं.  व्हीआयपी दर्शनावरून पंढरपुरात भाजप आणि शिवसेनेत दुजाभाव करण्यात आल्याचं समोर आलं आहे. व्हीआयपी दर्शन बंद असताना देखील मंत्र्यांसोबत आलेल्या अनेकांना थेट विठ्ठलाचं दर्शन देण्यात आलं, परंतु दुसरीकडे भाजपचे माजी मंत्री आणि आमदार असलेल्या सुधीर मुनगंटीवार आणि त्यांच्या कुटुंबीयांवर मात्र दर्शनासाठी ताटकळत राहण्याची वेळ आली.

नेमकं काय आहे प्रकरण? 

पंढरपुरात व्हीआयपी दर्शनावरून मंदिर प्रशासनाने दुजाभाव केल्याची मोठी घटना घडली आहे. भाजपचे माजी मंत्री सुधीर मुनगंटीवार यांच्या कुटुंबीयांना दर्शनासाठी ताटकळत ठेवण्यात आले. तर विद्यमान मंत्री गुलाबराव पाटील यांच्यासोबत असलेल्या व्यक्तींना थेट व्हीआयपी दर्शनासाठी सोडण्यात आल्याचा प्रकार घडला आहे. याबाबतचे व्हिडिओही सोशल मीडियावर  व्हायरल झाले आहेत.

यावरून भाजप नेते सुधीर मुनगंटीवार यांनी नाराजी व्यक्त केली आहे.  जिल्हाधिकारी यांनी दर्शनाला या म्हटल्यावर आपण आलो. पण मंदिरात समन्वयाचा अभाव आहे. अशी खंत त्यांनी यावेळी व्यक्त केली. तर गुलाबराव पाटील यांनी आपण लोकप्रतिनिधी आहोत अडीचशे किलोमीटर वरून प्रवास करून आलो, मग दर्शनाला द्यायलाच पाहिजे, माझ्या सोबत जे लोक होते, त्यांना दर्शनासाठी थेट आत सोडले अशी कबुली त्यांनी दिली आहे.  त्यामुळे आषाढीसाठी व्हीआयपी दर्शन बंद केल्याच्या पहिल्याच दिवशी व्हीआयपी दर्शनाचा मोठा फज्जा उडाल्याचं आता पहायला मिळत आहे. दरम्यान उद्यापासून आता विठ्ठलाचं मंदिर भक्तांना दर्शनासाठी 24 तास खुलं असणार आहे. तर आजपासून व्हिआयपी दर्शन बंद करण्यात आलं आहे.