सीबीआयची मोठी कामगिरी, नाशिकमधील बेकायदेशीर कॉल सेंटर रॅकेट उद्ध्वस्त, 5 जणांना अटक

केंद्रीय अन्वेषण विभागाने (सीबीआय) नाशिक जिल्ह्यातील इगतपुरी (रेनफॉरेस्ट रिसॉर्ट) येथे भाड्याने घेतलेल्या जागेत काही खाजगी व्यक्तींकडून चालवल्या जाणाऱ्या बेकायदेशीर कॉल सेंटर रॅकेटचा पर्दाफाश केला आहे. सीबीआयने 8 ऑगस्ट रोजी मुंबईतील रहिवासी असलेल्या 6 आरोपींविरोधात तसेच अज्ञात खाजगी व्यक्ती आणि बँक अधिकाऱ्यांविरुद्ध सायबर फसवणुकीचा गुन्हा दाखल केला आहे. याबाबत सविस्तर माहिती जाणून घेऊयात.

सीबीआयच्या या कारवाईत 44 लॅपटॉप, 71 मोबाईल फोन, सोने, लक्झरी कार आणि मोठ्या प्रमाणात रोख रक्कम जप्त करण्यात आली आहे. एफआयआरमध्ये असा आरोप करण्यात आला आहे की, या आरोपींनी अज्ञात व्यक्तींसोबत गुन्हेगारी कट रचला आहे आणि अमेझॉन सपोर्ट सर्व्हिसेस कॉल सेंटर असल्याचे भासवून बेकायदेशीर कॉल सेंटरमधून तोतयागिरी करून आणि फिशिंग कॉल/फसवे कॉल करून आर्थिक फसवणूक केली आहे.

समोर आलेल्या माहितीनुसार या आरोपींनी अमेरिका, कॅनडा आणि इतर देशांतील नागरिकांची फसवणूक केली आहे. गिफ्ट कार्ड आणि क्रिप्टोकरन्सीद्वारे फसवणूक करून पैसे मिळवले आहे. हे कॉल सेंटर इगतपुरी, नाशिक मध्ये सुरु होते. आरोपींनी सदर बेकायदेशीर कॉल सेंटर चालविण्यासाठी डायलर, व्हेरिफायर आणि क्लोजर अशा सुमारे 60 ऑपरेटरची नियुक्ती केली होती अशी माहितीही समोर आली आहे.

सीबीआयने आपल्या कारवाईत 44 लॅपटॉप आणि 71 मोबाईल फोनसह 1.20 कोटी रुपयांची बेहिशेबी रोकड, 500 ग्रॅम सोने आणि 1 कोटी रुपयांच्या 7 लक्झरी कार जप्त केल्या आहेत. तसेच अंदाजे 5000 USDT क्रिप्टोकरन्सी (5 लाख रुपये) आणि 2000 कॅनेडियन डॉलर किमतीचे गिफ्ट व्हाउचर (1.26 लाख रुपये) जप्त केले आहेत.

सीबीआयच्या कारवाईत कॉल सेंटरमध्ये काम करणारे 62 कर्मचारी लाईव्ह ऑपरेट करताना आढळले. त्यांच्याकडून परदेशी नागरिकांची फसवणूक करण्याची प्रक्रिया सुरू होती. आतापर्यंत 5 आरोपींना अटक करण्यात आली आहे. आता या स्कॅमच्या माध्यमातून किती लोकांची फसवणूक झाली? यात आणखी कुणाचा हात आहे का? याची चौकशी केली जाणार आहे.