“आरोग्य मंत्र्यांचाच मतदारसंघ आजारी”; या माजी खासदाराने पोलखोलच केली…

धाराशिवः हिवाळी अधिवेशनाच्या पहिल्याच महिला आमदार सरोज अहिर यांनी हिरकणी कक्षाबद्दल तक्रार केली होती. त्यानंतर हिरकणी कक्ष सुस्थितीत करून देऊन महिला आमदारांना अश्वस्त केल्याबद्दल आरोग्य मंत्री तानाजी सावंत कालपासून प्रचंड चर्चेत आले. त्यांच्या कामाचा गौरव चालू असतानाच दुसरीकडे मात्र माजी खासदार संभाजीराजे यांनी आरोग्य मंत्री तानाजी सांवत यांच्या मतदार संघाचा दौरा करून त्यांच्याच मतदार संघातील प्राथमिक आरोग्य केंद्राचा पंचनामा करून आरोग्य मंत्र्यांच्या मतदार संघातील आरोग्य विभागच आजारी असल्याचे दाखवून दिले आहे. त्यामुळे या दुसऱ्या घटनेमुळेही तानाजी सावंत आता चर्चेत आले आहे.

आरोग्यमंत्री डॉ. तानाजी सावंत यांच्या भुम मतदार संघातील आरोग्य यंत्रणेचा थेट छत्रपती संभाजी महाराज यांनी पंचनामा केला आहे.

भूम येथील ग्रामीण रुग्णालयाला संभाजी महाराज यांनी भेट देत तेथील परिस्थितीची पोलखोल केली आहे. या प्राथमिक आरोग्य केंद्रात डॉक्टर, नर्स यांची कमतरता आहे. तसेच रुग्णालयातील अनेक ठिकाणी अस्वच्छता, स्वच्छतागृहात पाणी नाही, अनेक मशीन बंद असुन धुळखात पडल्या आहेत. तर डॉक्टर कर्मचारी निवासस्थान परिसरात  घाणीचे साम्राज्य निर्माण झाले आहे.

यावेळी माजी खासदार संभाजीराजे यांच्यासमोर रुग्णालयातील अनेक रुग्णांनीही आपल्या व्यथा मांडल्या आहेत. त्यावेळी संभाजीराजे यांनीही त्यांच्या समस्या ऐकून घेत येथील समस्या मुख्यमंत्री आणि उपमुख्यमंत्र्यांच्या कानावर घातल्या जातील असंही त्यांनी यावेळी सांगितले.

छत्रपती संभाजी महाराज यांनी राज्य सरकारला चेतावणी दिली आहे की, काही सहन करू मात्र आरोग्य विभाग व प्राथमिक केंद्रांची दुरावस्था आम्ही सहन करणार नाही असंही त्यांनी यावेळी सांगितले. यावेळी त्यांनी तुम्ही काही केले नाही तर मी करून दाखवतो असं म्हणत त्यांनी सरकारला अल्टीमेटम दिला आहे.

माजी खासदार संभाजीराज यांनी आरोग्य मंत्र्यांच्या मतदारसंघातील आरोग्य केंद्राचाच पंचनामा केला आहे.  आरोग्यमंत्र्यांच्या मतदारसंघातील प्राथमिक आरोग्य केंद्राची दुरावस्था समोर आल्याने या पंचनाम्याची जोरदार चर्चा होऊ लागली आहे.

आरोग्यमंत्र्याच्या मतदारसंघातच आरोग्य केंद्राची ही अवस्था असेल तर इतर ठिकाणी काय अवस्था होईल असा सवालही त्यांनी उपस्थित केला आहे.

यावेळी संभाजीराजे यांनी आरोग्याचे विषय गांभीर्याने घ्या, अन्यथा मी बघून घेईल असा थेट इशाराच त्यांनी सरकारला दिला आहे.  रोग्य खात्याच्या दुरावस्थेबाबत राज्याचे मुख्यमंत्री उपमुख्यमंत्री यांना पत्र लिहून तक्रार करणार असल्याचेही छत्रपती संभाजी राजे यांनी सांगितले आहे.