राजकारण्यांचे धाबे दणाणले, आता जिल्हा बँकेच्या वसूली मोहिमेची ‘दादागिरी”

नाशिक : गेल्या काही वर्षांपासून आर्थिक अडचणीत असलेली नाशिकमधील एनडीसीसी बँक पुन्हा एकदा सक्रिय होऊ पाहत आहे. नाशिक जिल्हयातील थकबाकीदार असलेल्या 100 जणांना जिल्हा बँकेने रडारवर घेतले आहे, मागील महिन्यात पालकमंत्री दादा भुसे यांनी जिल्हा बँकेच्या प्रशासनाबरोबर बैठक घेतली होती. त्यानुसार शेतकऱ्यांना वेठीस न धरता किंवा लहान थकबाकीदारांना वेठीस धरू नका असा सज्जड दम दादा भुसे यांनी जिल्हा प्रशासनाला भरला होता, त्यानुसार जिल्हा बँकेच्या प्रशासनाने 100 बड्या थकबाकीदार यांच्याकडून वसूली मोहीम सुरू करण्यात आली आहे. यामध्ये शेतकऱ्यांच्या जमिनी लाटण्याचा धक्कादायक् प्रकार समोर आल्याने पालकमंत्री दादा भुसे चांगलेच आक्रमक झाले होते. त्यानंतर पालकमंत्री भुसे यांनी राज्य शासन विशेष चौकशी करणार असल्याची माहिती दिली होती. याशिवाय बँकेतील गैरव्यवहारांची पाळेमुळे खोदून काढेल, असा इशारा पालकमंत्री दादा भुसे यांनी दिल्याने खळबळ उडाली होती.

नाशिकच्या जिल्हा बँकेतील आर्थिक बेशिस्तीबाबत जिल्हा नियोजन समितीच्या बैठकीत वादळी चर्चा झाली होती.

शेतकऱ्यांकडून सक्तीची कर्जवसुली होत असल्याकडे आमदारांनी आवाज उठवला होता, त्यावरून चौकशी व्हावी अशी मागणी केली होती.

नाशिक जिल्ह्याची कधीकाळी अर्थवाहिनी म्हणून ओळख असलेली एनडीसीसी बँक सध्या मोठ्या आर्थिक अडचणीत असल्याने तिला उभारी देण्यासाठी भुसे यांनी पुढाकार घेतला आहे.

नाशिक जिल्ह्यातील शेतकऱ्यांना आणि संचालकांना कर्ज देतांना तपासणी न करता कर्ज दिल्याची चर्चा होत असतांना संचालकांवर कारवाई न होता लहान-लहान शेतकऱ्यांना बँक प्रशासनाने वेठीस धरले होते.

जिल्हा बँकेने मागील चार महिन्यांपूर्वी ऐन शेतीचे कामे सुरू असतांना नाशिक जिल्ह्यातील शेतकऱ्यांच्या साधनानांवर वसूली कारवाई सुरू केली होती.

मात्र, पालकमंत्री यांनी चौकशीचा दम भरल्याने मोठ्या राजकीय थकबाकीदार यांचे धाबे चांगलेच दणाणले असून येत्या काळात काय कारवाई होते ही बघनं महत्वाचे ठरणार आहे.