चालकाला डुलकी लागल्याने अपघात, पाचोऱ्यात भरधाव पिकअपने चौघांना उडवले

जळगाव : पहाटे जास्त अपघात होतात. चालकाला डुलकी येते. तरी काही चालक पहाटे गाड्या चालवतात. अशावेळी सावधानता बाळगणे गरजेचे असते. पण, छोट्याशा चुकीमुळे अपघात होत असतात. पहाटे पाचची वेळ. पीकअप चालकाचे गाडीवरील नियंत्रण सुटले. त्यामुळे त्याने एका चौकात बसलेल्या चौघांना उडवले. यात दोघ जणांचे दोन्ही पाय निकामे झाले आहेत. या घटनेमुळे पहाटे उठून फिरायला जाणारे चांगलेच धास्तावले आहेत.

पीकअप-दुचाकीचा अपघात

पाचोरा तालुक्यात पिकअप आणि दुचाकीचा भीषण अपघात झाला आहे. भडगावकडून बुलढाण्याच्या दिशेने जाणाऱ्या भरधाव पिकअपने चौघांना उडवले. शहरातील महाराणा प्रताप चौकातील श्री दत्त मंदिरासमोर ही घटना घडली. या धडकेत चौघांपैकी दोघांचे पाय गुडघ्यापासून निकामे झालेत. दोन जण किरकोळ जखमी झाले आहेत. जखमींना काँग्रेसचे तालुका अध्यक्ष सचिन सोमवंशी यांच्या मदतीने तात्काळ खाजगी रुग्णालयात दाखल करण्यात आले. जखमींवर उपचार सुरू आहेत.

या चौघांना उडवले

पहाटे पाच वाजता हा अपघात झाला. भडगावच्या दिशेने बुलढाण्याकडे एमएचबीएम ७९४३ ही पिकअप भरधाव वेगाने जात होती. ड्रायव्हरचा ताबा सुटल्याने हा अपघात झाला. शहरातील महाराणा प्रताप चौकात श्री दत्त मंदिरासमोर काही जण बसले होते. बसलेल्या वसंत भाईदास पाटील (वय ४२) रा. सुरत, विनोद पाटील (वय, ५०) रा. पाचोरा, अमोल वाघ (वय २७) रा. पाचोरा आणि कुंदन परदेशी (वय १७) रा. पुनगाव या चौघांना जोरदार धडक दिली.

दोन पाटलांचे दोन्ही पाय निकामी

धडक इतकी जोरदार होती की, या धडकेत वसंत पाटील आणि विनोद पाटील यांचे गुडघ्यापासून दोन्ही पाय निकामे झाले आहेत. घटनेची माहिती मिळताच पाचोरा काँग्रेसचे तालुका अध्यक्ष सचिन सोमवंशी घटनास्थळी दाखल झाले. त्यांच्या व सहकार्यांच्या मदतीने जखमींना तात्काळ पाचोरा येथील खाजगी रुग्णालयात दाखल करण्यात आले आहे. पिकअपच्या ड्रायव्हर आणि किन्नरला पोलिसांनी ताब्यात घेतले आहे.