कुणालच्या हट्टापायी अख्खं कुटुंब संपलं, डोंगरावरून पडून आई-वडिलांचा मृत्यू, आता मोठ्या भावाबद्दल धक्कादायक माहिती समोर
छत्रपती संभाजीनगरमधून एक हादरवणारी घटना समोर आली आहे. डोंगरावरून पडून एकाच कुटुंबातील तिघांचा मृत्यू झाला. त्यानंतर आता या घटनेतील मृत तरुण कुणाल चांदवडे याच्या भावाबद्दल धक्कादायक माहिती समोर आली आहे.
छत्रपती संभाजीनगरमध्ये एक हादरून सोडणारी घटना घडली आहे. या घटनेमुळे संपूर्ण जिल्ह्यात हळहळ व्यक्त होत आहे. वडिलांसोबत झालेल्या वादानंतर कुणाल चांदवडे नावाचा तरुण शहरापासून जवळच असलेल्या डोंगरावर आत्महत्येच्या उद्देशानं गेला. त्यानंतर त्याच्यापाठोपाठ त्याचे वडील मुरलीधर चांदवडे आणि आई संगिता चांदवडे हे दोघेही गेले. कुणाल हा डोंगराच्या टोकावर उभा होता, थोडा जरी धक्का लागला तर तो कधीही खाली कोसळू शकतो अशी पस्थिती होती. तो सकाळी साडेदहाच्या सुमारास घरातून बाहेर पडला होता. त्यानंतर तब्बल तीन तास त्याचे आई-वडील त्याची समजूत घालत होते. परंतु तो काही ऐकण्यास तयार नव्हता.
दरम्यान या घटनेची माहिती पोलीस आणि अग्निशमन दलाला कळाल्यानंतर ते देखील घटनास्थळी पोहोचले. स्थानिक नागरिकांनी देखील घटनास्थळी गर्दी केली. जो तो आपल्या परीने कुणालची समजूत घालण्याचं काम करत होता. परंतु कुणाल कोणाचंही ऐकण्याच्या मनस्थतीमध्ये नव्हता. तीन तास त्याची समजूत घालणं सुरूच होतं. अखेर वडिलांचा संयम सुटला आणि त्यांनी त्याला पकडण्याचा प्रयत्न केला. परंतु त्याचवेळी त्याने उडी मारली, त्याच्यासोबत त्याचे वडील देखील डोंगरावरून खाली कोसळले.
दरम्यान वडील आणि मुलगा आपल्या डोळ्यादेखील डोंगरावरून खाली कोसळला हा मानसिक धक्का त्याच्या आईला सहन झाला नाही, आणि त्याची आई संगिता चांदवडे यांनी देखील डोंगरावरून खाली उडी मारली क्षणात अख्ख कुटुंब संपलं. दरम्यान आता कुणाल यांच्या मोठ्या भावाविषयी धक्कादायक माहिती समोर आली आहे. त्याच्या मोठ्या भावाचं आजारपणामुळे आकाली निधन झालं होतं, त्यानंतर आता कुणाल याने देखील आपल्या आयुष्याचा शेवट केला. कुणाल याचे वडील ट्रक चालवायचे, ते अनेकदा कामानिमित्त बाहेरच असायचे, मात्र घरात मुलगा आणि वडिलांचं पटत नव्हतं, त्यांच्यामध्ये सातत्याने खटके उडायचे अशी माहिती देखील आता समोर येत आहे. काल देखील असाच वाद झाला असावा, आणि रागाच्या भरात कुणालने टोकाचं पाऊल उचललं असावं अशी देखील चर्चा सुरू आहे.
