जरांगेंना दसरा मेळाव्यासाठी शुभेच्छा, पण त्यांनी व्यासपीठावरून…, ललिता तारख यांची मोठी मागणी

ललिता तारख यांच्या दसरा मेळाव्यासाठी शुभेच्छा

काही दिवसांपूर्वी अंतरवाली सराटी येथील आंदोलनावरून ललिता तारख यांनी मराठा आरक्षण आंदोलक मनोज जरांगे पाटील यांच्यावर जोरदार टीका केली होती. त्यांनी मनोज जरांगे पाटील यांच्यावर आरोप देखील केले होते. दरम्यान त्यानंतर आता ललिता तारख यांनी मनोज जरांगे पाटील यांना दसरा मेळाव्यासाठी शुभेच्छा दिल्या आहेत.  जरांगे पाटलांच्या दसरा मेळाव्याला शुभेच्छा, पण त्यांनी त्या ठिकाणावरून एक आवाहन करावं, तुमच्या आंदोलनात लाखोंच्या संख्येने महिला होत्या, त्यांचा सिंहाचा वाटा होता, पण तुमच्यासोबतची जी टोळी आहे ती महिलांना खूप गलिच्छ भाषेत ट्रोलिंग करते त्यांना थांबवा, अशी मागणी यावेळी ललिता तारख यांनी केली आहे.

नेमकं काय म्हणाल्या तारख? 

जरांगे पाटलांच्या दसरा मेळाव्याला शुभेच्छा, पण त्यांनी त्या ठिकाणावरून एक आवाहन करावं, तुमच्या आंदोलनात लाखोंच्या संख्येने महिला होत्या, त्यांचा सिंहाचा वाटा होता, पण तुमच्यासोबतची जी टोळी आहे ती महिलांना खूप गलिच्छ भाषेत ट्रोलिंग करते त्यांना थांबवा. आता तुम्ही पण थांबा कारण तुम्ही सरकारला ज्या भाषेत बोललात तेच शब्द तुमच्या लाभार्थी टोळीने झेलले आहेत. त्याचाच वापर ते करत आहेत, असं यावेळी तारख यांनी म्हटलं आहे. दरम्यान दसरा मेळाव्याबद्दल काहीही अडचण नाहीये, दसरा मेळावे करा एकत्र या पण तुमची भाषा आधी बदला आणि तुमच्या लोकांना पण बदलायला सांगा, कारण तसं वातावरण आता राहिलेलं नाहीये, आतापर्यंत सहन केलं यापुढे सहन करणार नाही, असा इशारा देखील यावेळी ललिता तारख यांनी जरांगे पाटील यांना दिला आहे.

ललिता तारख यांनी आज जालन्याच्या पालकमंत्री पंकजा मुंडे यांची भेट घेतली आहे. सोशल मीडियावर होणाऱ्या ट्रोलिंग संदर्भात मी सविस्तर चर्चा केली.  मला आणि माझ्या कुटुंबाच्या जीविताला धोका असून, संरक्षण देण्याची निवेदनाद्वारे मागणी केल्याचं यावेळी ललिता तारख यांनी म्हटलं आहे. ट्रोलिंग थांबलं तर ठीक आहे, अन्यथा पुन्हा एकदा मुख्यमंत्री देवेंद्र फडणवीस यांची  भेट घेणार आहे, असंही त्या यावेळी म्हणाल्या.