दिशा सालियनप्रकरणी अखेर एसआयटी स्थापन, एसआयटीत कोण कोण?; आदित्य ठाकरे यांच्या अडचणी वाढणार?

गिरीश गायकवाड, टीव्ही9 मराठी प्रतिनिधी, नागपूर | 12 डिसेंबर 2023 : ठाकरे कुटुंबाला अडचणीत आणणारी मोठी बातमी आहे. दिशा सालियन मृत्यूप्रकरणी एसआयटीची स्थापना करण्यात आली आहे. या एसआयटीच्या सदस्यांची नावेही जाहीर करण्यात आली आहेत. त्यामुळे एसआयटीचं काम आता सुरू होणार आहे. दिशा सालियन मृत्यूप्रकरणात सत्ताधाऱ्यांकडून माजी पर्यावरण मंत्री आदित्य ठाकरे यांचं नाव घेतलं जात होतं. त्यामुळे आता एसआयटीची स्थापना झाल्याने आदित्य ठाकरे यांच्या अडचणीत वाढ होण्याची शक्यता वर्तवली जात आहे. राज्य सरकारने एसआयटीची घोषणा केली असून त्यावर अद्याप ठाकरे गटाची प्रतिक्रिया आलेली नाहीये.

नागपूरमध्ये राज्याचं हिवाळी अधिवेशन सुरू आहे. या अधिवेशनात दिशा सालियन मृत्यूप्रकरणाचा मुद्दा पुन्हा एकदा सत्ताधाऱ्यांनी उचलला आहे. विशेष म्हणजे माजी मुख्यमंत्री उद्धव ठाकरे कालच नागपूरमध्ये आले. त्यानंतर सत्ताधाऱ्यांनी दिशा सालियन प्रकरण उचलून धरलं. दिशा सालियन प्रकरणी एसआयटी तपास करणार असल्याची बातमी कालच येऊ धडकली होती. त्यानंतर आज या प्रकरणाचा तपास करण्यासाठी एसआयटीची स्थापनाही करण्यात आली आहे. या एसआयटीत बड्या अधिकाऱ्यांचा समावेश करण्यात आला आहे.

कोण करणार तपास

दिशा सालियन मृत्यूप्रकरणी स्थापन करण्यात आलेल्या एसआयटीमध्ये अपर पोलीस आयुक्त राजीव जैन, उपायुक्त अजय बंसल, वरिष्ठ पोलीस निरीक्षक चिमाजी आढाव यांचा समावेश करण्यात आला आहे. तसेचदेवेन भारती हे एसआयटीवर लक्ष ठेवून राहतील पण ते समोर येणार नाहीत अशी खात्रीलायक सूत्रांची माहिती आहे.

काय आहे दिशा सालियन प्रकरण?

9 जून 2020 रोजी दिशा सालियनचा मुंबईतील मालाडमध्ये मृत्यू झाला होता. इमारतीच्या 14 व्या मजल्यावरून पडून तिचा मृत्यू झाला होता. हे प्रकरण सुशांत राजपूत मृत्यू प्रकरणाशी जोडलं गेलं होतं. सुशांतचा मृत्यू 14 जून 2020 रोजी झाला होता. काहींच्या मते दिशाने आत्महत्या केली होती. तर काहींच्या मते दिशाचा मृत्यू संशयास्पद होता. भाजपच्या काही नेत्यांनी तर या प्रकरणी आदित्य ठाकरे यांच्यावरही आरोप केला होता.

कोण होती दिशा सालियन?

दिशाही कर्नाटकातील उडुप्पी येथील होती. ती सेलिब्रिटी मॅनेजर होती. वरुण शर्मा, सुशांतसिंह राजपूत, भारती सिंह आदि लोकप्रिय कलाकरांसोबत तिने काम केलं होतं. त्याशिवाय ती अनेक जाहिरात कंपन्यांशीही जोडलेली होती. ती टेलिव्हिजन अभिनेता रोहन रायला डेट करत होती. मृत्यूच्या काही दिवस आधी तिचा साखरपुडाही झाला होता.