Maharashtra News LIVE : राष्ट्रवादी, शिवसेना,काँग्रेसच्या अनेक पदाधिकाऱ्यांचा आज होणार भाजपात प्रवेश

पुणे जिल्ह्यातील आंबेगाव तालुक्यातील वडगाव पीर येथील स्मशानभूमीत अंत्यसंस्कारासाठी आलेल्या नागरिकांवर अचानक मधमाशांच्या मोहोळाने हल्ला चढवल्याने एकच गोंधळ उडाला. या अनपेक्षित घटनेमुळे उपस्थित ग्रामस्थांना काही काळासाठी मृतदेह जागेवरच ठेवून जीव वाचवण्यासाठी पळ काढावा लागला. अंत्यसंस्काराची प्रक्रिया सुरू असतानाच स्मशानभूमी परिसरातील मधमाशांचे मोहोळ अचानक उठले आणि उपस्थितांवर तुटून पडले. मधमाशांच्या हल्ल्यामुळे स्मशानभूमीत भीतीचे वातावरण निर्माण झाले. जीव वाचवण्यासाठी नागरिकांनी सैरावैरा धाव घेतली.

सांगलीच्या कृष्णा नदीत आज पुन्हा एकदा परंपरा,साहस आणि थराराचा संगम पाहायला मिळाला.दुथडी भरून वाहणाऱ्या कृष्णा नदीच्या पात्रात पार पडलेल्या पारंपरिक होड्यांच्या शर्यतीने सांगलीकरांची मने जिंकली. सांगली आणि कोल्हापूर जिल्ह्यातील दहा हून अधिक संघांनी या स्पर्धेत सहभाग घेत प्रचंड वेगाने वाहणाऱ्या नदीच्या प्रवाहाला छेद देत आपल्या कौशल्याचे दर्शन घडवले. भाजपा युवा मोर्चाचे प्रदेशाध्यक्ष कृष्णाराज महाडिक यांच्या प्रमुख उपस्थितीत या स्पर्धेचा शुभारंभ झाला.तर चुरशीच्या या लढतीत सांगलीवाडीच्या तरुण मराठा बोट क्लबने प्रथम क्रमांक पटकावत मानाची गदा आपल्या नावावर केली.

खान्देशातील दमदार पावसामुळे तापी नदीने  रौद्ररूप धारण केले. नंदुरबारच्या सारंगखेडा बॅरेजचे १० तर प्रकाशा बॅरेजचे १३ दरवाजे उघडले आहेत. सारंगखेडा बॅरेजमधून १ लाख ३२ हजार क्युसेक वेगाने पाण्याचा विसर्ग सुरू झाला आहे. तापी नदीकाठच्या गावांना प्रशासनाचा सतर्कतेचा इशारा देण्यात आला आहे.  पुढील काही दिवसांत पाणीपातळी आणखी वाढण्याची शक्यता वर्तवण्यात आली आहे.  प्रशासनाकडून परिस्थितीवर बारकाईने लक्ष देण्यात आलं आहे.

छत्रपती संभाजीनगर मध्ये सरकारी डॉक्टरांना खासगी प्रॅक्टिसला परवानगी नाकारण्यात आली आहे. मुंबई उच्च न्यायालयाच्या औरंगाबाद खंडपीठाचा महत्त्वाचा निर्णय घेण्यात आला आहे. NPA स्वीकारल्यानंतर खासगी प्रॅक्टिस करता येणार नाही; डॉक्टरांच्या याचिका फेटाळल्या आहेत.

जातीनिहाय जनगणना न झाल्याने ओबीसी, व्हीजेएनटी आणि एसबीसी समाजाचे दरवर्षी 15 हजार कोटी रुपयांपेक्षा जास्त नुकसान होत असल्याचा आरोप करण्यात आला आहे. केंद्र सरकारने तातडीने जातीनिहाय जनगणना करावी, या प्रमुख मागणीसाठी सकल ओबीसी महामोर्चाच्या वतीने विदर्भात 5 वी मंडल जनगणना यात्रा आयोजित करण्यात आली आहे. भंडारा, नागपूर, वर्धा, यवतमाळ, वाशीम, बुलढाणा, अकोला, अमरावती, गोंदिया, गडचिरोली आणि चंद्रपूर अशा सर्व ११ जिल्ह्यांतून ही यात्रा जाणार आहे. मागण्या मान्य न झाल्यास संपूर्ण देशभरात तीव्र आंदोलन छेडण्याचा इशारा देण्यात आला असून, मुख्य संयोजक उमेश कोरम यांनी या जनजबाब यात्रेत सर्व नागरिकांनी आणि कार्यकर्त्यांनी मोठ्या संख्येने सहभागी होण्याचे आवाहन केले आहे. या यात्रेची सुरुवात आज भंडारा येथून होणार असून ओबीसी नेते विजय वडेट्टीवार हे या यात्रेला हिरवी झेंडी देणार आहेत.

जालन्याच्या भोकरदन नगर परिषद प्रशासनाची भोकरदन शहरातील नागरिकांकडे पाणीपट्टी आणि मालमत्ता करापोटी जवळपास 76 लाख रुपयांची थकबाकी थकीत असल्याची माहिती समोर आली मात्र नगर परिषदेच्या सुरु असलेल्या कर वसुली मोहिमेकडे शहरातील नागरिकांनी कानाडोळा केला असल्याचे चित्र पाहायला मिळतंय. नागरिकांचा अपेक्षित प्रतिसाद मिळत नसल्याने शहरातील मूलभूत सुविधा पुरविण्यात नगरपरिषद अपयशी ठरत असल्याचं पाहायला मिळतंय. मागील वर्षी नगरपरिषद प्रशासनाने मालमत्ता करापोटी 45 लाख तर पाणीपट्टी 15 लाख रुपये असे एकूण 60 लाख रुपये वसूल केले होते, मात्र यंदा केवळ 65 लाख रुपयांची वसुली करण्यात आल्याची माहिती नगरपरिषद प्रशासन कडून करण्यात आली, दरम्यान शहरातील नागरिकांनी थकबाकी भरून तात्काळ सहकार्य करावे असे आवाहन करण्यात आलं.

कल्याणमध्ये वाहतुकीच्या नियमांना केराची टोपली दाखवण्यात आली आहे. संतोषी माता रोडवरून सुरू झालेला हा थरारक प्रवास स्वामी सहजानंद चौक मार्गे आग्रा रोडपर्यंत सुरू असल्याचे समोर आले. भर रस्त्यात बोनटवर बसून तरुणाने धिंगाणा घातल्याने इतर वाहनचालक आणि पादचाऱ्यांच्या सुरक्षेचा प्रश्न ऐरणीवर आला आहे. स्टंटबाजीचा व्हिडिओ सोशल मीडियावर व्हायरल होत असून नागरिकांकडून संताप व्यक्त केला जात आहे. अशा जीवघेण्या स्टंटमुळे मोठी दुर्घटना घडू शकली असती; संबंधित तरुण आणि वाहनचालकावर कठोर कारवाईची मागणी.

जालना जिल्ह्यातील अंबड एसटी आगाराच्या ताफ्यात ‘राजमाता जिजाऊ’ या 6 नव्या एसटी बसेस दाखल झाल्या. या बसेसचे उद्घाटन आमदार नारायण कुचे यांच्या हस्ते करण्यात आले. यावेळी एसटी महामंडळतील अधिकारी, कर्मचारी उपस्थित होते. ‘राजमाता जिजाऊ’ बसेसच्या समावेशामुळे अंबड आगाराची प्रवासी सेवा अधिक सक्षम होणार असून प्रवाशांना सुरक्षित, आरामदायी व दर्जेदार प्रवासाची सुविधा मिळणार आहे.तसेच अंबड आगारासाठी आणखी चार नवीन बसेस लवकरच दाखल होण्याची शक्यता असल्याची माहितीही यावेळी देण्यात आली.

डोंबिवलीतील सोनारपाडा परिसरात काळे कपडे, डोक्यावर टोपी आणि तोंडावर मास्क घातलेल्या चोरट्यांनी घरफोडी करत दहशत निर्माण केली. शंकरा नगर येथील समर्थ कृपा इमारतीत तीन ते चार जणांच्या चोराच्या टोळीने दरवाजा तोडून घरात प्रवेश केल्याची घटना उघडकीस आली. चोरट्यांची संपूर्ण हालचाल इमारतीतील इमारतीतील CCTV कॅमेरा पाहताच चोरट्यांनी तो दुसऱ्या दिशेला फिरवण्याचा प्रयत्न केला, मात्र त्याआधी त्यांचे चेहरे आणि हालचाली कॅमेऱ्यात रेकॉर्ड झाल्या. सलग घरफोडीच्या घटनांमुळे सोनारपाडा परिसरातील रहिवाशांमध्ये भीतीचे वातावरण निर्माण झाले असून सुरक्षेचा प्रश्न ऐरणीवर आला आहे. घटनेची माहिती मिळताच पोलिसांनी तपास सुरू केला असून CCTV फुटेजच्या आधारे चोरट्यांचा शोध घेतला जात आहे.