आदित्य ठाकरेंना रिटायर करायचं, 2029 साली… शिंदेंच्या बड्या नेत्याचा प्लॅन ठरला; आगामी निवडणुकीत गेम होणार?

Milind Deora : सहा खासदार आणि विश्वासी मानला जाणारा एक आमदार थेट शिंदे गटात गेल्याने माजी उपमुख्यमंत्री उद्धव ठाकरे यांना अस्तित्त्वाची लढाई लढावी लागणार आहे. आमदार सचिन अहिर हे शिंदे गटात जाताच त्यांना विधानपरिषदेचं उपसभापतीपद दिलं गेल्यानं एका प्रकारे ठाकरे यांच्यापुढे मुंबईतही नवं आव्हान उभं केलं जात आहे. अहिर यांचं वरळी मतदारसंघात मोठं प्रस्थ आहे. याच मतदारसंघात ठाकरे गटाचे नेते आदित्य ठाकरे हे आमदार आहेत. दरम्यान, आता याच आदित्य ठाकरे यांच्याबाबत शिंदे गटाचे नेते मिलिंद देवरा यांनी मोठं विधान केलं आहे. या विधानानंतर भविष्यातील विधानसभा निवडणुकीत वरळी मतदारसंघात चुरशीची आणि अस्तित्त्वाची लढाई लढली जाण्याची शक्यता आहे.

2029 सालाच्या निवडणुकीत नक्कीच बदल होणार

मिलिंद देवरा उपमुख्यमंत्री एकनाथ शिंदे यांच्या पक्षाचे राज्यसभेतील खासदार आहेत. त्यांनी सचिन अहिर यांचे कौतुक करताना वरळी विधानसभा मतदारसंघावर महत्त्वाचं भाष्य केलं आहे. 2029 सालाच्या निवडणुकीत नक्कीच बदल होणार आहे. या भागातल्या आमदारांना आपण रिटायर करायचं आहे, असं मिलिंद देवरा उपस्थितांना उद्देशून बोलले आहेत. आदित्य ठाकरे हे वरळी विधानसभा मतदारसंघाचे आमदार आहेत. देवरा यांनी आदित्य ठाकरेंचे प्रत्यक्ष नाव घेतले नाही. परंतु त्यांचा रोख हा आदित्य ठाकरेंकडेच होता, असे बोलले जात आहे.

आमचा बाँड खूपच स्ट्राँग

आज इथे लोकांची एवढी गर्दी पाहून मला वाटतंय की 2029 लाी नक्कीच बद्दल होणार आहे. बदल होणार म्हणजे वरळीचा आमदार बदलणार आहे. शिंदे साहेबांचं मी मनापासून आभार मानतो कारण सर्वसामान्य वरळीकरांचा तर खूप फायदा होणार आहे. सचिन अहिर यांनी माझे वडील मुरली देवरा यांच्यासोबतही काम केलेले आहे. आमचा बाँड खूपच स्ट्राँग आहे. आज आपण एका टीममध्ये आहोत याचा मला आनंद आहे, असे मतही मिलींद देवरा यांनी व्यक्त केले. सचिन भाऊ यांच्या नेतृत्वात वरळीकरांना खऱ्या अर्थाने न्याय मिळेल. उपसभापती हे खूप महत्त्वाचे पद आहे, असेही देवरा म्हणाले. त्यामुळे आता भविष्यात नेमके काय होणार, हे पाहणे महत्त्वाचे ठरणार आहे.