खंडोबाच्या मंदिरात आक्रित घडलं… पांडवकालीन शिवलिंग गायब, मध्यरात्रीच… पुण्यात खळबळ

राज्यात गुन्ह्यांचं प्रमाण प्रचंड वाढलं आहे. चोरी, दरोड्याच्या घटना आपण ऐकत असतोच. पण पुण्याजवळ नुकताच असा प्रकार घडला ते ऐकून सगळेच हादरले. एका अज्ञात चोरामुळे मंदिरातील देवांनांही धक्का बसला. अज्ञात इसमाने चक्क मंदिरातील शिवलिंगच चोरी केल्याचा भयाक प्रकार समोर आला आणि गावकरी हैराण झाले. पांडवकालीन शिवलिंगाची अज्ञात व्यक्तीने तोडफोड करून चोरी करण्यात आली होती. मात्र सतर्क ग्रामस्थ आणि पोलिसांच्या मदतीने त्या शिवलिंगाचा शोध घेण्यात यश मिळालं. या संपूर्ण घटनेची सध्या सगळीकडे चर्चा सुरू आहे.

पुण्यातील मुळशी तालुक्यातील मुलखेड-घोटावडे परिसरात ही धक्कादायक घटना घडल्याचं समोर आलं होतं. दुर्गम डोंगरावर वसलेल्या खंडोबा मंदिरातील पांडवकालीन शिवलिंगाची, अज्ञात व्यक्तीने तोडफोड केली आणि चोरी केल्याचा प्रकार उघड झाला. मात्र ग्रामस्थांच्या सतर्कतेमुळे आणि पोलिसांच्या मदतीने हे शिवलिंग मंदिर परिसरातच सापडलं.

नेमकं काय घडलं? 

पुण्यातील मुळशी तालुक्यातील मुलखेड गावात हा प्रकार घडला. तेथे सुमारे 1700 ते 1800 मीटर उंचीवर वसलेलं हे खंडोबा मंदिर आहे. जंगलातील खडतर रस्ता पार केल्यानंतरच या मंदिरात पोहोचता येतं. आणि याच मंदिरात पांडवकालीन शिवलिंग स्थापित आहे. मात्र एका अज्ञात चोरट्याने मंगळवारी रात्री या शिवलिंगाची तोडफोड केली आणि ते चोरी केल्याचा धक्कादायक प्रकार घडल्याचे समोर आले. विशेष म्हणजे ही घटना घडून तब्बल तीन दिवस झाले, तरीही ग्रामस्थांना याची कल्पनाही नव्हती. ते शिवलिंग जिथे होतं, त्या ठिकाणी दगडी कुंडी ठेवण्यात आली होती. त्यामुळे शिवलिंग चोरीला गेलंय हे नागरिकांना समजलंही नाही.

मात्र जेव्हा हा प्रकार लक्षात आला, तेव्हा गावात एकच खळबळ उडाली. शिवलिंगद चोरीला गेल्या सगळेच हादरले. त्यानंतर ग्रामस्थ एकत्र आले आणि त्यांनी शुक्रवारी पौड पोलीस ठाणे येथे तक्रार दाखल केली. यामागे माथेफिरू व्यक्ती असल्याचा अंदाज पोलिसांनी वर्तवला होता.

अखेर सापडलं शिवलिंग

ग्रामस्थांची तक्रार मिळताच पोलिसांनी या घटनेची गंभीर दखल घेतली आणि घटनास्थळी धाव घेत शोधमोहीम सुरू केली. शनिवारी ग्रामस्थ आणि पोलिसांनी, या संपूर्ण डोंगर परिसरात सर्च ऑपरेशन राबवलं. बराच काल शोध सुरू होता. अखेर त्या डोंगराच्या पायथ्याशीच हे शिवलिंग सापडलं, त्यामुळे सर्वांचाच जीव भांड्यात पडला.

चोरीला गेलेल हे शिवलिंग सापडल्यामुळे परिसरातील तणाव काही प्रमाणात निवळला. मात्र असं असलं तरीही चोरीच्या या घटनेमागे नेमकं कोण आहे, याचा तपास सुरू आहे. अज्ञात चोरटा अद्याप फरार असून पोलीसांकडून त्याचा शोध घेण्यात येत आहे. अतिशय दुर्गम भागातील या ऐतिहासिक मंदिरात घडलेल्या, चोरीच्या घटनेमुळे सुरक्षेचा प्रश्न पुन्हा ऐरणीवर आला आहे. आता आरोपी चोराला अटक कधी होते, याकडेच सर्वांचं लक्ष लागलं आहे.