बाळासाहेब ठाकरे यांच्या स्मृतीदिनाच्या पूर्वसंध्येला शिवतीर्थवर राडा; आज परिस्थती काय?

निवृत्ती बाबर, प्रतिनिधी – टीव्ही 9 मराठी, मुंबई | 17 नोव्हेंबर 2023 : शिवसेना प्रमुख बाळासाहेब ठाकरे यांचा आज स्मृतीदन आहे. त्यानिमित्त राज्यभरातून शिवसैनिक शिवतीर्थवर येत आहेत. बाळासाहेब ठाकरे यांना अभिवादन करत आहेत. अशातच काल ठाकरे गट आणि शिंदे गटामध्ये राडा झाला. बाळासाहेबांच्या स्मृतीस्थळाजवळ हा प्रकार घडला. त्यामुळे तणावाचं वातावरण निर्माण झालं. अशात आज शिवतीर्थवर कडेकोट पोलीस बंदोबस्त तैनात आहे. शिवाजीपार्क परिसराला छावणीचं स्वरूप आलं आहे. शिंदे गट आणि ठाकरे गटात झालेल्या राड्यानंतर शिवाजी पार्क परिसरात आज मोठा पोलीस बंदोबस्त तैनात करण्यात आला आहे. दंगल नियंत्रण पथक शिवाजी पार्कमध्ये तैनात आहे. दरम्यान, बाळासाहेब ठाकरे यांना अभिवादन करण्यासाठी उद्धव ठाकरे आणि ठाकरे कुटुंबीय शिवाजी पार्कवर येणार आहेत.

शिंदे गट- ठाकरे गट आमने सामने

मुंबईच्या दादरच्या शिवाजी पार्क मैदानावर असलेल्या शिवसेनाप्रमुख बाळासाहेब ठाकरे यांच्या स्मृतीस्थळावर मोठा राडा झाला. बाळासाहेब ठाकरे यांचा आज स्मृतीदिवस आहे. त्यानिमित्ताने मुख्यमंत्री एकनाथ शिंदे यांनी बाळासाहेब ठाकरे यांच्या स्मृतीस्थळावर जावून बाळासाहेबांना अभिवादन केलं. एकनाथ शिंदे बाळासाहेबांना श्रद्धांजली वाहून निघून गेल्यानंतर शिवाजी पार्क मैदानावर मोठा राडा झाला. शिंदे आणि ठाकरे गटाचे कार्यकर्ते या ठिकाणी आमनेसामने आले.

आज दोन्ही गट आमने सामने येऊ नयेत, यासाठी पोलीस प्रशासनाची कसोटी आहे. शिवाजी पार्क स्वातंत्र्यवीर सावरकर स्मारकाच्या समोरील गेटवरून नेते उपनेते यांना दर्शनासाठी सोडण्यात येईल. तसंच शिवसैनिकांना समर्थ व्यायाम शाळेजवळून सोडण्यात येणार आहे. पोलीस प्रशासनाला मदत करण्याचं शिवसेनेकडून आवाहन करण्यात आलं आहे. काल दोन्ही गटात राडा झाल्यानंतर आज इथे काय घडतं याकडं सर्वांचं लक्ष आहे. दोन्ही गटात हाणामारी होऊन देखील अजून पोलिसांकडून कोणतीही कारवाई करण्यात आलेली नाही. काल घटनास्थळी नक्की काय झालं होतं याविषयीचे फुटेज पोलीस प्रशासनाकडून तपासलं जाऊ शकतं.

डीसीपी मनोज पाटील यांनी शिवाजी पार्कवरच्या या राड्यावर प्रतिक्रिया दिली. काल राडा झाला त्यासंदर्भात कायदेशीर प्रक्रिया सुरु आहे. आज येणाऱ्या शिवसैनिकांना आवाहन आहे की, या ठिकाणाचं गांभीर्य लक्षात घ्यावं. कोणताही अनुचित प्रकार घडू नये, म्हणून काळजी घ्या. तसंच आज या ठिकाणी जास्त पोलीस बंदोबस्त यार ठिकाणी तैनात असेल, अशी माहिती मनोज पाटील यांनी दिली आहे.