चर्चगेट-बोरिवली लोकलमधून प्रवाशाला फेकले, वांद्रे खाडीवर लोकल आली असताना, घडली घटना
चर्चगेट-बोरिवली लोकलमधून एका व्यक्तीला फेकून दिल्याचा धक्कादायक प्रकार घडला आहे.या प्रकरणात वांद्रे येथील खाडीत हा तरुण पडला असून त्याला पोलिसांनी रुग्णालयात दाखल केले आहे.
चर्चगेट ते बोरीवली धावणाऱ्या लोकलमधून एका प्रवाशाला किरकोळ वादातून लोकलमधून फेकून दिल्याची घटना घडली आहे. वांद्रे खाडीजवळ ही घटना घडली असून जखमी प्रवाशाला वांद्रे पश्चिमेकडील भाभा रुग्णालयात उपचारासाठी दाखल केले असून त्याचा उपचारादरम्यान मृत्यू झाल्याचे सांगण्यात येते. यापूर्वी देखील लोकल मधून प्रवाशांना फेकून देण्याच्या घटना पश्चिम रेल्वेवर घडलेल्या आहेत.
अपंगाच्या डब्यात झाली मारामारी
चर्चगेट ते बोरीवली धावणाऱ्या लोकल ट्रेनमध्ये अंपगाच्या डब्यात झालेल्या वादातून एका प्रवाशाला लोकलमधून खाली ढकलल्याने त्याचा मृत्यू झाल्याची धक्कादायक घटना घडली आहे. रेल्वे पोलिसांकडून मिळालेल्या माहितीनुसार आज दुपारी 1:24 वाजता चर्चगेट ते बोरीवली धीमी लोकल वांद्रे स्टेशनच्या प्लॅटफॉर्म क्रमांक 1 वर आली असताना प्रवाशांनी पोलिसांना सांगितले की एका मंदबुद्धी व्यक्तीने चालत्या ट्रेनमधून एका प्रवाशाला वांद्रे ते माहिम दरम्यान खाली ढकलले.
माहिती मिळताच रेल्वे पोलिसांनी वांद्रे आणि माहिम दरम्यान बेशुद्ध अवस्थेत पडलेल्या व्यक्तीला पोलिसांनी शोधून त्याला रुग्णालयात दाखल केले, मात्र उपचारादरम्यान त्याचा मृत्यू झाला. पोलिसांनी या प्रकरणात 48 वर्षीय आरोपी अमजद सफरुद्दीन शेख याला ताब्यात घेतले आहे. आरोपीने सांगितले की डब्यात कावळा आल्याने त्याला हाकलताना हा धक्का लागल्याचा दावा केला आहे.
जयबाला आशर प्रकरणाची आठवण
पश्चिम रेल्वेवर यापूर्वी डब्यातील गर्दी आणि वादातून प्रवाशांना लोकलमधून फेकण्याच्या घटना घडलेल्या आहेत. ९० च्या दशकात तर जयबाला आशर या तरुणीला गर्दुल्ल्याने लोकलच्या डब्यात फेकल्याने आणि नेमकी लोकल त्यावेळी आल्याने तिच्या पायांवरुन लोकल गेल्याने ही घटना प्रचंड चर्चेत आली होती. त्यानंतर जयबाला आशर हीला पश्चिम रेल्वेने नोकरीत ठेवले होते. मध्य रेल्वेवर डोंबिवलीतील एक तरुण भावेश निकटे लोकलच्या दरवाज्याला लटकत प्रवास करत असताना खाली कोसळून त्याचा मृत्यू झाला होता.
