इंडिया आघाडीच्या मोर्चात महिलांशी गैरवर्तन; संजय राऊत यांचा खळबळजनक आरोप
इंडिया आघाडीच्या दिल्लीतील अभूतपूर्व मोर्चात महिलांशी गैरवर्तन झाल्याचा खळबळजनक आरोप संजय राऊत यांनी केला आहे. हा मोर्चा रोखण्यासाठी मोदी सरकारने प्रचंड सुरक्षा दल तैनात केले होते. बंदुकांच्या बळावर खासदारांना थांबवून राहुल गांधींना रात्री उशिरा सोडून देण्यात आले.
इंडिया आघाडीचा कालचा मोर्चा अभूतपूर्व होता. हा मोर्चा अडवण्यासाठी मोदी सरकारने मोठा फौजफाटा तैनात केला होता. मोर्चेकऱ्यांना अटकाव केला जात होता. पण आता ठिणगी पडली आहे. ही ठिणगी देशभर पसरणार आहे, असं सांगतानाच कालच्या मोर्चात महिलांशी गैरवर्तन करण्यात आले होते, असा खळबळजनक आरोप संजय राऊत यांनी केला आहे. राऊत यांच्या या आरोपाने मोठी खळबळ उडाली आहे. मीडियाशी संवाद साधताना राऊत यांनी हा आरोप केला आहे.
निवडणूक आयोगापर्यंत आमचा मोर्चा निघाला. हा मोर्चा अभूतपूर्व होता. राहुल गांधी यांच्या नेतृत्वात अनेक पक्ष काल रस्त्यावर उतरले होते. बॉर्डर सेक्युरिटी फोर्स ज्यांचं काम देशाच्या सीमांचं रक्षण करणं आहे, पण कालच्या मोर्चासाठी बॉर्डर सेक्युरीटी फोर्सचे जवान तैनात करण्यात आले होते. आम्हाला रोखण्यासाठी सीआरपीएफचे जवानही होते. काल दीड लाख पोलीस तैनात होते. जणू पावणे तीनशे खासदार अतिरेकी आहेत, अशा पद्धतीने हा लवाजमा तैनात होता. हे दुर्देव आहे, असं संजय राऊत म्हणाले.
बंदूकीच्या बळावर रोखलं
आमचा मोर्चा आयोगापर्यंत जाऊ दिला असता, आयोगाला भेटू दिलं असतं तर काय बिघडलं असतं? निवडणूक आयुक्त खासदारांना भेटत नाहीत, मग काय मोदी शाहांना भेटणार? चोर लफंग्यांना भेटणार? बंदूकांच्या बळावर मोदींनी खासदारांना रोखलं. अटक केली. महिला खासदारांशी गैरवर्तन झालं. रात्री साडे अकरा वाजता राहुल गांधींची सुटका झाली, असं राऊत यांनी सांगितलं.
आता आंदोलन थांबणार नाही
आता हे आंदोलन थांबणार नाही. देशभरात ठिणगी पेटली आहे. आजही दिल्लीत आंदोलन होईल. राहुल गांधी तयारी करत आहेत. नियोजित कामामुळे आम्हाला मुंबईत यावं लागलं. आम्ही परत दिल्लीत जाऊ. पण आता ज्ञानेश कुमार यांना जावं लागेल. अमित शाह कुठे आहेत? कुठे भूमिगत झाले? मोदी का बोलत नाहीत? शासनातील विविध पदांवर राहून मोदींना 25 वर्ष झाली आहेत. त्यामुळे शेकडो कोटीच्या जाहिराती दुष्काळी महाराष्ट्राला दिल्या आहेत. ही यांची सेवा? ही यांची संस्कृती? हे जाहिरातीवरचे 4-500 कोटी वाचवले असते, तर शेतकऱ्यांना दिलासा मिळाला असता. ही चमचेगिरी सुरू आहे. एकतर्फी चमचेगिरी सुरू आहे. त्याचा अंत होत आहे. राहुल गांधींनी ती वेळ आणली आहे, असंही ते म्हणाले.
