भारतातील सर्वात महागडी डील, तब्बल इतक्या कोटींनी विकला गेला फ्लॅट

मुंबई : मुंबईमध्ये घरांची किंमत ही गगनाला भिडत आहे. मुंबईत वाढत असलेल्या घरांच्या किंमतीमुळे सर्वसामान्यांना मुंबईत घरं घेणं आता जवळपास अवाक्याबाहेर जाताना दिसत आहे. मुंबईत घर असावं असं अनेकांचं स्वप्न असतं. पण हे स्वप्न पूर्ण करण्यासाठी अनेकांची आर्थिक बाजू तितकी भक्कम नसते. त्यामुळेच ते मुंबईत घर खरेदी करण्याचं स्वप्न पूर्ण करु शकत नाही. असं असलं तरी देखील मुंबईत महागडे घरे घेणाऱ्यांची संख्या कमी आहे. आता मुंबईत आणखी एक विक्रम पाहायला मिळाला आहे. कारण भारतातील सर्वात महागडा फ्लॅट हा मुंबईत विकला गेला आहे. ( Most Expensive Flat in Mumbai )

18000 चौरस फुटाचा ट्रिपलेक्स फ्लॅट

मुंबईतील लोढा निवासी इमारतीतील ( Lodha Builders ) घरासाठी विक्रमी करार झाला आहे. लोढांच्या टॉवरमधील 18000 चौरस फुटाचा ट्रिपलेक्स फ्लॅट तब्बल 252 कोटी रुपयांना विकला गेला आहे. दक्षिण मुंबईतील वाळकेश्वर येथे उद्योगपती निरज बजाज आणि मॅक्रोटेक डेव्हलपर्स ( लोढा ग्रुप ) यांच्यातील व्यवहार आजपर्यंतचा भारतातील सर्वात महागडा ( Most Expensive Flat ) व्यवहार ठरला आहे.

1,441 चौरस फुटांची गॅलरी

29 व्या मजल्यावर असणारा फ्लॅट सर्वाधिक मोठा असून, त्याचा कार्पेट एरिया 6061 चौरस फूट इतका आहे. रेराच्या नियमावलीनुसार एकूण कार्पेट एरिया 12,624 चौरस फूट असल्याचं स्पष्ट होत आहे. या ट्रीप्लेक्स फ्लॅटची वैशिष्ट्य म्हणजे यातल्या प्रत्येक फ्लॅटला 1,441 चौरस फुटांची गॅलरी/ वरांडा/ खुला टेरेस देण्यात आला आहे.

जून 2026 मध्ये पूर्ण होणार प्रोजेक्ट

या महागड्या डीलमध्ये बजाज यांनी साधारण 1,40,277 प्रती चौरस फूट इतक्या दरानं कोट्यवधी रुपये मोजले आहेत. जून 2026 मध्ये हा संपूर्ण प्रोजेक्ट तयार होईल, दोन विंग्समध्ये इथं एकूण 36 फ्लॅट्स बांधले जात असल्याचं सांगण्यात येत आहे.

याआधी 240 कोटींमध्ये विक्री

याआधी मुंबईतील वरळी येथे देशातील सर्वात महागड्या पेंटहाऊसची ( Pent House ) विक्री झाली होती. या घराची किंमत तब्बल 240 कोटी रुपये होती. जे रतन टाटा यांच्या घरापेक्षा महाग असल्याचं सांगितलं जात होतं. हे घर वेलस्पन ग्रुपचे चेअरमन बी. के. गोयंका यांनी विकत घेतले होते.