सावधान, मध्य रेल्वेच्या मुख्य आणि हार्बर मार्गावर रविवारी मेगा ब्लॉक
पायाभूत सुविधांची देखभाल आणि रेल्वेच्या सुरक्षित संचालनासाठी हे रेल्वे मार्गावरील मेगा ब्लॉक्स आवश्यक असून प्रवाशांना होत असलेल्या गैरसोयीबद्दल आम्ही दिलगीर आहोत असे मध्य रेल्वेच्या प्रशासनाने म्हटले आहे.
मध्य रेल्वेने रविवार दि.९ ऑगस्ट २०२६ रोजी देखभाल आणि दुरुस्तीच्या कामासाठी मुख्य मार्गावर माटुंगा- मुलुंड स्थानकाच्या दरम्यान आणि हार्बर मार्गिकेवर छत्रपती शिवाजी महाराज टर्मिनस – सीएसएमटी, मुंबई आणि चुनाभट्टी-वांद्रे स्थानकादरम्यान मेगाब्लॉकचे आयोजन केले आहे. यामुळे रविवारी लोकलने प्रवास करणाऱ्या मुंबईकरांना लोकलचा प्रवास करताना गर्दीचा सामना करावा लागू शकतो.
मुख्य मार्गिका
माटुंगा–मुलुंड स्थानकादरम्यान अप आणि डाऊन धीम्या मार्गावर सकाळी 11.05 वा.ते दु. 03.55 वाजेपर्यंत
डाऊन धिम्या मार्गावर सीएसएमटी, मुंबईतून सकाळी 10.14 वा. ते दु. 03.32 दरम्यान धावणाऱ्या लोकल फेऱ्यांना माटुंगा आणि मुलुंड दरम्यान डाऊन फास्ट मार्गिकेवर वळवण्यात येईल. या लोकल सायन, कुर्ला, घाटकोपर, विक्रोळी, भांडुप तसेच मुलुंड स्थानकांवर थांबतील. त्यानंतर मुलुंडहून पुन्हा या लोकल डाऊन धिम्या मार्गावर चालवल्या जातील आणि आपल्या गंतव्य स्थानकावर 15 मिनिटांच्या उशीराने पोहचतील.
अप स्लो मार्गावर ठाण्याहून सकाळी 11.07 वा. ते दु. 03.51 वाजेपर्यंत धावणाऱ्या लोकल फेऱ्या मुलुंडहून अप फास्ट लाईनवर वळवल्या जातील. या ट्रेन मुलुंड, भांडुप, विक्रोळी, घाटकोपर, कुर्ला आणि सायन स्थानकांवर थांबतील. त्यानंतर माटुंगावरुन पुन्हा अप धिम्या मार्गावर या लोकल चालवल्या जातील आणि आपल्या गंतव्य स्थानकावर सुमारे 15 मिनिटांच्या उशीराने पोहचतील.
स. 11.00 वाजता ते दुपारी 5.00 दरम्यान सीएसएमटीहून प्रस्थान करणाऱ्या तसेच सीएसएमटीला पोहचणाऱ्या सर्व अप आणि डाऊन लोकल आपल्या निर्धारित वेळेच्या सुमारे 15 मिनिटे उशीराने गंतव्य स्थानकावर पोहचतील.
हार्बर लाईन
सीएसएमटी–चुनाभट्टी – वांद्रे डाऊन हार्बर लाईन 11.40 वा. ते सायंकाळी 4.40 वाजेपर्यंत तसेच चुनाभट्टी-वांद्रे–सीएसएमटी अप हार्बर लाईनवर सकाळी 11.10 वा. ते सायंकाळी 4.10 वाजेपर्यंत
सीएसएमटी, मुंबई ते वाशी-बेलापुर-पनवेलसाठी सकाळी 11.16 वा. ते सायंकाळी 4.47 वाजताच्या दरम्यान धावणाऱ्या डाऊन हार्बर लोकल तसेच वांद्रे-गोरेगावसाठी सकाळी 10.48 वा. ते सायंकाळी 4.43 वाजेपर्यंत चालणाऱ्या डाऊन हार्बर लोकल फेऱ्या रद्द होतील.
पनवेल-बेलापुर-वाशी ते सीएसएमटीसाठी सकाळी 09.53 वा. ते दुपारी 3.20 वाजेपर्यंत तसेच गोरेगाव – वांद्रे ते सीएसएमटीसाठी सकाळी 10.45 वा. ते सायंकाळी 5.13 वाजेपर्यंत चालणाऱ्या अप हार्बर फेऱ्या रद्द राहतील.
पश्चिम रेल्वे द्वारा वांद्रे आणि गोरेगाव स्थानकांच्या दरम्यान स. 10.30 वा. ते दुपारी 3.30 वाजेपर्यंत शॅडो ब्लॉक देखील परिचालित केला जाणार आहे.
ब्लॉकच्या काळात पनवेल आणि कुर्ला (प्लॅटफॉर्म क्रमांक 8) च्या दरम्यान दर 20 मिनिटांनी विशेष लोकल फेऱ्या चालवल्या जातील.
ब्लॉक कालावधीत, सकाळी 10.00 ते सायंकाळी 6.00 वाजेपर्यंत, हार्बर लाईनच्या प्रवाशांना मेन लाईन आणि वेस्टर्न रेल्वेमार्गे प्रवास करण्याची मुभा देण्यात आली आहे.
