पवार अ‍ॅडमिट, राष्ट्रवादीत मोठ्या घडामोडी, बड्या नेत्याने तटकरेंना फटकारलं?

ज्येष्ठ नेते शरद पवार रुग्णालयात उपचार घेत आहेत. काल रात्री राष्ट्रवादीचे नेते प्रफुल्ल पटेल यांनी पवारांची भेट घेऊन त्यांच्याशी तासभर चर्चा केली. त्यानंतर आज सकाळी राष्ट्रवादीचे प्रदेशाध्यक्ष सुनील तटकरे यांनी मोठा बॉम्ब टाकला आहे. अजित पवारांनी दोन्ही राष्ट्रवादीच्या विलिनीकरणाची कल्पना दिली होती, असं सुनील तटकरे यांनी सांगून राजकीय वर्तुळात खळबळ उडवून दिली आहे. तटकरेंचं हे विधान येताच त्यावर राजकीय प्रतिक्रिया उमटत आहेत. शरद पवार गटाचे नेते अनिल देशमुख यांनी तर तटकरे यांना चांगलंच फटकारलं आहे. अजितदादांनी विलिनीकरणाची तारीख ठरवली होती. विलिनीकरण होणार होतं हे आम्ही तेव्हा सांगत असताना तुम्ही नाकारत का होता? आता कोणत्या हेतूने विलिनीकरणाबद्दल बोलत आहात? असा सवालच अनिल देशमुख यांनी केला आहे.

माजी मंत्री अनिल देशमुख यांनी टीव्ही9 मराठीशी संवाद साधताना ही प्रतिक्रिया दिली आहे. अजित पवार आणि शरद पवार यांच्यात विलिनीकरणाच्या बैठका झाल्या होत्या. दोन्ही पक्ष एकत्र आले पाहिजे ही चर्चा झाली होती. या बैठका झाल्या होत्या, असं आम्ही तेव्हा सांगत होतो. पण तेव्हा अशी काही चर्चाच झाली नाही. अजितदादांनी वेगळ्या कारणांनी बैठका घेतल्या होत्या, असं सुनील तटकरे सांगत होते. अजितदादा मला कधीच विलिनीकरणाबाबत बोलले नाही, असंही तटकरे तेव्हा सांगत होते. आता तटकरेंना अचानक काय झालं? त्यावेळी तर तुम्ही चर्चाच नाकारत होता. तेव्हा तुम्ही कुणाचा अजेंडा राबवत होता हे माहीत नाही. कुणाच्या सांगण्यावरून तुम्ही असं बोलत होता? आता का वेगळी भूमिका घेतली आहे? असे सवालच अनिल देशमुख यांनी केले आहेत.

आताच का वाटयला लागलं?

विलिनीकरणाबाबत तटकरेंना आजच का वाटू लागलं आहे? दोन्ही पक्षाची बैठक झाल्याचं तेव्हाच का सांगितलं नाही? आम्ही फोटोही दाखवलं होते. त्यांच्या पक्षात काही नवीन बदल होणार असतील, काही घडत असेल त्यामुळे ते बोलत असतील. 12 फेब्रुवारीला आम्ही एकत्र येणार होतो. तारीखही ठरली होती. तेव्हा तटकरेंनी विरोध केला होता. आज त्यांना अचानक काय झालं?, असा सवाल देशमुख यांनी केला.

आता शक्यच नाही

सध्याच्या परिस्थिती दोन्ही पक्ष एकत्र येण्याचा प्रश्नच नाही. आता एकत्र येणं सोपं नाहीये. जेव्हा एकत्र येण्याचं ठरलं होतं, तेव्हा दादांच्या निधनानंतर याच लोकांनी विरोध केला होता, असं सांगतानाच त्यांच्या पक्षात अंतर्गत काय सुरू आहे माहीत नाही. तो त्यांच्या पक्षाचा वैयक्तिक प्रश्न आहे, असंही त्यांनी म्हटलंय.