मुंबई मेट्रोपॉलिटन रिजन ॲट 2034; दिग्गजांच्या उपस्थितीत, पायाभूत सुविधांवर होणार चर्चा…
पायाभूत सुविधांचा दर्जा वाढविण्यासाठी सुचविलेल्या उपाययोजनांची श्वेतपत्रिका मुख्यमंत्र्यांना सादर केली जाणार आहे.
मुंबई: देशाची आर्थिक राजधानी असलेल्या मुंबईसह आसपासच्या मुंबई महानगर प्रदेशाच्या पायाभूत सुविधांचा दर्जा वाढविण्यासाठी विविध क्षेत्रांतील तज्ज्ञ मंडळींना एकाच मंचावर आणणाऱ्या ‘मुंबई मेट्रोपॉलिटन रिजन ॲट 2034’ (Mumbai Metropolitan Region at 2034)या विशेष परिषदेचे आयोजन मुंबईत करण्यात येत आहे. लोकसभेतील गटनेते खासदार राहुल शेवाळे (Lok Sabha group leader MP Rahul Shewale) , खासदार डॉ. श्रीकांत शिंदे (MP Dr. Shrikant Shinde) यांच्या पुढाकाराने आणि कन्स्ट्रक्शन टाईम्सच्या सहकार्याने मुंबईच्या फोर सिझन हॉटेल येथे शनिवार, 15 ऑक्टोबर रोजी ही एकदिवसीय परिषद पार पडणार आहे.
या परिषदेचे उद्घाटन महाराष्ट्राचे सार्वजनिक बांधकाम मंत्री रवींद्र चव्हाण यांच्या हस्ते करण्यात येणार आहे. तर समारोपाच्या सत्रात मुख्यमंत्री एकनाथजी शिंदे उपस्थित राहणार आहेत.
यावेळी पायाभूत सुविधांचा दर्जा वाढविण्यासाठी सुचविलेल्या उपाययोजनांची श्वेतपत्रिका मुख्यमंत्र्यांना सादर केली जाणार आहे. तसेच परिषदेनंतर पायाभूत सुविधा क्षेत्रात विशेष योगदान देणाऱ्या तज्ज्ञांचा सन्मानही मुख्यमंत्र्याच्या हस्ते करण्यात येणार आहे.
मुंबई महानगरपालिकेच्या कामकाजाचा प्रदीर्घ अनुभव असलेले खासदार राहुल शेवाळे यांच्या संकल्पनेतून आयोजित करण्यात येणाऱ्या या विशेष परिषदेत रस्ते विषयक नवीन तंत्रज्ञान, घनकचरा व्यवस्थापन, झोपडपट्टी मुक्त मुंबई-धारावी पुनर्विकास, शहरी दळणवळण, अतिवृष्टीमुळे साचणारे पाणी, रियल इस्टेट क्षेत्र अशा विविध क्षेत्रांतील समस्या आणि त्या सोडविण्यासाठी उपाययोजना याविषयी चर्चा केली जाणार आहे.
तसेच स्टॅक (STAC) समितीच्यावतीनेही विशेष सादरीकरण केले जाणार आहे. या परिषदेला, मुंबई महानगर प्रदेश प्राधिकरण (एमएमआरडीए), महाराष्ट्र औद्योगिक विकास महामंडळ ( एमआयडीसी), झोपडपट्टी पुनर्वसन प्राधिकरण ( एसआरए), महाराष्ट्र राज्य रस्ते विकास महामंडळ (एमएसआरडीसी) अशा मुंबई महानगर प्रदेशातील महत्त्वाच्या शासकीय प्राधिकरणांचे सहकार्य लाभले असून राज्यातील ज्येष्ठ सनदी अधिकारी आणि तज्ज्ञ मंडळी इथे आपले विचार मांडणार आहेत.
मुंबई मेट्रोपॉलिटन रिजन ॲट 2034 या परिषदेच्या माध्यमातून मुंबई महानगर प्रदेशातील पायाभूत सुविधा, या प्रदेशाच्या सर्वांगीण विकासासमोरील आव्हाने आणि यावर मात करण्यासाठी नेमक्या उपाययोजना याविषयीची विस्तृत चर्चा करण्याचा आमचा मानस असल्याचे खासदार राहुल शेवाळे यांनी सांगितले.
या परिषदेत तज्ज्ञ मंडळींनी सुचविलेल्या उपाययोजना आणि त्यांनी मांडलेली मते यांची एक श्वेतपत्रिका माननीय मुख्यमंत्री एकनाथ शिंदे यांना सुपूर्द करण्यात येईल.
तसेच या उपाययोजनांची प्रत्यक्ष अंमलबजावणी करण्यासाठी संबंधित यंत्रणांकडे पाठपुरावा केला जाणर असल्याचेही खासदार राहुल रमेश शेवाळे यांनी सांगितले.
