काउंटडाऊन सुरु, मुंबईत घर घेण्याचे स्वप्न पूर्ण होणार, म्हाडाच्या लॉटरीची तारीख ठरली
मुंबईत हक्काचे घर घेण्याचे स्वप्न आता पूर्ण होणार आहे. म्हाडा मुंबई मंडळाकडून २५०० घरांसाठी एप्रिल २०२६ मध्ये लॉटरी काढली जाणार असून, मार्चअखेर अधिकृत जाहिरात प्रसिद्ध होईल. मागाठाणे, विक्रोळी आणि प्रतीक्षा नगर यांसारख्या भागांतील घरांचा यात समावेश असेल.
स्वप्ननगरी असलेल्या मुंबईत स्वतःच्या मालकीचे घर असावे, असे अनेकांचे स्वप्न असते. हे स्वप्न पाहणाऱ्या सर्वसामान्यांसाठी एक अत्यंत आनंदाची बातमी आहे. महाराष्ट्र गृहनिर्माण व क्षेत्रविकास प्राधिकरण अर्थात म्हाडा (MHADA) मुंबई मंडळाच्या वतीने तब्बल २५०० घरांसाठी विशेष लॉटरी काढण्याची तयारी पूर्ण झाली आहे. विशेष म्हणजे, येत्या मार्च महिन्याच्या अखेरीस या लॉटरीची अधिकृत जाहिरात प्रसिद्ध होणार आहे. तर एप्रिलमध्ये या घरांची सोडत काढली जाणार आहे.
मार्चअखेर जाहिरात, एप्रिलमध्ये सोडत
मिळालेल्या माहितीनुसार, मुंबईतील घरांच्या वाढत्या किंमती लक्षात घेता सर्वसामान्यांना परवडणाऱ्या दरात घरे उपलब्ध करून देण्याचे नियोजन म्हाडाने केले आहे. या लॉटरीसाठीची प्रशासकीय तयारी अंतिम टप्प्यात आहे. मार्च महिन्याच्या शेवटच्या आठवड्यात जाहिरात प्रसिद्ध झाल्यानंतर, इच्छुकांना अर्ज भरण्यासाठी सुमारे एक महिन्याचा कालावधी दिला जाणार आहे. अर्जांच्या छाननीनंतर एप्रिल महिन्याच्या अखेरीस घरांची संगणकीय सोडत (Lottery) जाहीर केली जाण्याची शक्यता आहे.
प्राथमिक माहितीनुसार, यावेळीच्या लॉटरीमध्ये मुंबईतील मोक्याच्या ठिकाणांचा समावेश आहे. यात प्रामुख्याने मागाठाणे (बोरिवली), प्रतीक्षा नगर (सायन), विक्रोळी या ठिकाणचा समावेश असणार आहे. यासोबतच मुंबईतील इतर उपनगरांमधील विविध उत्पन्न गटांतील (EWS, LIG, MIG, HIG) घरांचा यात समावेश असेल.
पत्राचाळीतील घरांचा सध्यातरी समावेश नाही
मुंबई मंडळाकडून सुरुवातीला ५००० घरांची लॉटरी काढण्याचे नियोजन होते. मात्र, गोरेगाव पश्चिमेतील सिद्धार्थ नगर (पत्रा चाळ) प्रकल्पातील सुमारे २५०० घरांचे बांधकाम अद्याप पूर्ण झालेले नाही. हे काम पूर्ण होण्यासाठी पुढील वर्षाचा अखेर उजाडू शकतो. त्यामुळे अर्जदारांचा हिरमोड होऊ नये आणि ताबा मिळण्यास विलंब होऊ नये, यासाठी म्हाडाने या लॉटरीत केवळ तयार घरांचाच समावेश करण्याचा निर्णय घेतला आहे.
अल्प दरात घर घेण्याची संधी
खाजगी विकासकांच्या घरांच्या किमती गगनाला भिडल्या असताना, म्हाडाची घरे आजही सर्वसामान्यांच्या खिशाला परवडणारी असतात. त्यामुळे या लॉटरीकडे मुंबईकरांचे मोठ्या प्रमाणावर लक्ष लागून राहिले आहे. त्यामुळे ज्या नागरिकांना मुंबईत घर घ्यायचे आहे, त्यांनी आपली आवश्यक कागदपत्रे तयार ठेवावीत, असे आवाहनही अप्रत्यक्षपणे या घडामोडींतून करण्यात आले आहे.
