अरे हे तर माक्राँ, मरीन ड्राईव्हवर फ्रान्सच्या अध्यक्षांना जॉगिंग करताना पाहून मुंबईकर झाले अचंबित
सकाळी मरिन ड्राईव्हवर राष्ट्राध्यक्ष इमॅन्युएल माक्राँ यांना सकाळी जॉगिंग करताना पाहून मुंबईकरांना त्यांच्या डोळ्यावर विश्वास बसेना. अनेकांना त्यांना ओळखले नाही तर काहींनी त्यांचा व्हिडीओ मोबाईलवर चित्रित केला.
भारताच्या तीन दिवसांच्या दौऱ्यावर आलेले फ्रान्सचे राष्ट्राध्यक्ष इमॅन्युएल माक्राँ यांना अनोखा अंदाज मुंबईकरांना पाहायला मिळाला. इतके बिझी शेड्युल असतानाही त्यांनी स्वत: च्या प्रकृतीसाठी खास वेळ काढला आणि मरिन ड्राईव्हवर ते सर्वसामान्य मुंबईकरांसारखे जॉगिंग करताना दिसले.त्यांना अनेकांना ओळखले नाही तर काही मुंबईकरांनी ओळखत त्यांना पाहून आश्चर्य व्यक्त केले. इमॅन्युएल माक्राँ यांचा सकाळचा जॉगिंग करताना पाहून अनेकांच्या भुवया उंचावल्या. मुंबईकरांनी त्यांना शुभेच्छा दिल्या. माक्राँ त्यांची पत्नी ब्रिगिट्टी मॅरी – क्लाऊडे माक्राँ यांच्यासह सोमवारी रात्री भारताच्या दौऱ्यावर आले आहेत.
मुंबईच्या छत्रपती शिवाजी महाराज आंतरराष्ट्रीय विमानतळावर महाराष्ट्र आणि गुजरातचे राज्यपाल आचार्य देवव्रत, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांनी त्यांचे स्वागत केले.
फ्रान्सचे राष्ट्राध्यक्ष यांची मरीन ड्राईव्हवर जॉगिंग
रात्री ताज हॉटेलमध्ये विश्रांती घेतल्यानंतर सकाळी फ्रान्सचे अध्यक्ष माक्राँ ब्ल्यु टी-शर्ट आणि काळ्या शॉर्ट्समध्ये मुंबईच्या प्रसिद्ध मरीन ड्राईव्हवर जॉगिंग करताना ते दिसले. त्यांच्या सोबत साध्या वेषात सुरक्षा अधिकारी देखील होते…तेही त्यांच्यासोबत धावत होते.
तरीही माक्राँ हे आरामात धावताना मुंबईच्या सकाळच्या वातावरणाचा आनंद घेताना दिसले. त्यांना असे धावताना पाहून काही मुंबईकरांनी त्यांना ओळखणाऱ्यांनी त्यांचे व्हिडीओ चित्रित केले. ते हात हालवून लोकांचे अभिवादन स्वीकारताना दिसले.
त्यांना अशा प्रकारे निश्चिंत होऊन जॉगिंग करताना पाहून उद्योगपती हर्ष गोयंका यांनी त्यांच्या एक्स एकाऊंटवर लिहीले की यामुळे एक स्पष्ट होते की त्यांच्या सोबत सुरक्षेचा मोठा लवाजमा नव्हता.सुरक्षारक्षकही मोजके होते. ते शहरातील लोकांमध्ये मिक्स झालेले दिसले. आणि दुसरी गोष्ट म्हणजे नेतागिरी करण्यासाठी स्टॅमिनाची गरज असते हे आपल्याकडील नेत्यांना कळायला हवे.
26/11च्या शहीदांना ताज हॉटेलात वाहिली श्रद्धांजली
माक्राँ यांनी मरीन ड्राईवर जॉगिंग केल्यानंतर त्यांच्या पत्नी सोबत ताज हॉटेलात 26/11 च्या अतिरेकी हल्ल्यातील शहीदांच्या स्मृतीसाठी बनवलेल्या स्मारकाला श्रद्धांजली वाहिली.त्यांना भेटण्यासाठी बॉलिवूडचे कलाकारही येथे आले होते. यात अनिल कपूर, मनोज वाजपेयी, शबाना आझमी आणि ऋचा चढ्ढा आदी कलाकार होते. माक्राँ यांनी नंतर मुंबई छत्रपती शिवाजी टर्मिनस या इमारतीला देखील भेट दिली.
