BEST कर्मचाऱ्यांविरोधात आता ॲक्शन? पोलिसांची एंट्री… संप चिघळणार की गुंडाळणार?

BEST Employees Strike: बृहन्मुंबई विद्युत पुरवठा आणि परिवहनच्या (BEST) कर्मचाऱ्यांनी विविध मागण्यांसाठी संपाचे हत्यार उपसले आहे. या बेमुदत संपाचे पडसाद लागलीच दिसले. गेल्या दोन दिवसांपासून मुंबईकरांचे मोठे हाल सुरू आहे. लोकल, मेट्रो, टॅक्सीवर प्रमाणापेक्षा प्रवाशांचा अधिक भार वाढला आहे. या संपामुळे वाहतूक व्यवस्था कोलमडली आहे. लाखो मुंबईकरांना प्रवासासाठी मोठी कसरत करावी लागत आहे. बेस्ट कर्मचाऱ्यांसोबत सकारात्मक चर्चा झाली असली तरी संप अजून मागे घेण्यात आलेला नाही. शिष्टाई कामी येत नसल्याने कर्मचाऱ्यांविरोधात मोठी कारवाई होण्याची शक्यता आहे. संप मोडून काढण्यासाठी आता तयारी सुरू झाली आहे.

पोलिसांची ॲक्शन

डेपोमधून निघाणाऱ्या बेस्ट बसेस अडवण्यात येत आहे. अशा आंदोलक कर्मचाऱ्यांविरोधात पोलिस आता गुन्हा नोंदवणार आहेत. प्रशासन आणि मुंबई पोलिसांनी बेस्ट कर्मचारी संघटनांचा हा संप महाराष्ट्र अत्यावश्यक सेवा परिरक्षण अधिनियम (MESMA) 2023 अंतर्गत अवैध घोषीत करण्यात आला आहे. तर आंदोलकांनी मुंबईत कायदा आणि सुव्यवस्था मोडीत काढून नये असे आवाहन पोलिसांनी अगोदरच केले. पण काही ठिकाणी डेपो बाहेर पडणाऱ्या बसवर दगड फेकण्यात आल्याने वातावरण तणावपूर्ण झाले होते.

6 बसवर दगडफेक, पोलिस करणार कारवाई

ताज्या अपडेटनुसार शुक्रवारी सकाळी आणि नंतर काही बसेस डेपोच्या बाहेर येत असताना BEST बसेसवर आंदोलक कर्मचाऱ्यांनी दगडफेक केली. बेस्ट कर्मचाऱ्यांच्या काही संघटना या संपात सहभागी नाहीत. तर काही संघटनांनी आंदोलनाची हाक दिली आहे. त्यातंर्गत कोणतीही बस डेपो बाहेर न आणण्याचे आवाहन करण्यात आले होते. पण काही डेपोंमधून बेस्ट बस बाहेर पडत असताना दगडफेक झाली. त्यामुळे या बस पुन्हा डेपोत वाहनतळावर उभ्या करण्यात आल्या. आता दगडफेक करणाऱ्या कर्मचाऱ्यांविरोधात पोलीस कारवाई करणार असल्याची माहिती समोर येत आहे.

BEST च्या एकूण 2,766 बसमधील 38 बस विविध डेपोमधून बाहेर काढण्याचा प्रयत्न करण्यात आला होता. त्यामुळे कर्मचारी आक्रमक झाले. त्यांनी डेपोबाहेरच या बसवर दगडफेक केली. त्यामुळे काही भागात दगडफेक झाली. काही काळ या भागात तणाव निर्माण झाला होता. तरीही काही भागात बेस्टची सेवा सुरू असल्याची माहिती समोर येत आहे. BEST ही मुंबईतील सार्वजनिक वाहतूक व्यवस्थेची नाळ मानली जाते. रोज जवळपास 23-25 लाख मुंबईकर या सेवेचा लाभ घेतात.