मुख्यमंत्र्यांच्या पत्रकार परिषदेआधी मोठी बातमी, ठाकरे गटाला मोठं खिंडार पडणार?
मुख्यमंत्री एकनाथ शिंदे यांनी आज रात्री आठ वाजता पत्रकार परिषद बोलावली आहे. त्यांच्या या पत्रकार परिषदेकडे सर्वांचं लक्ष लागलेलं आहे. या पत्रकार परिषदेत मुख्यमंत्री नेमकं काय बोलणार? याबाबतची उत्सुकता दाटलेली असताना एक महत्त्वाची बातमी समोर आली आहे.
मुंबई : मुख्यमंत्री एकनाथ शिंदे यांनी आज पत्रकार परिषद बोलावल्याची महत्त्वाची बातमी समोर आलीय. या पत्रकार परिषतदेत मुख्यमंत्री नेमकं काय बोलणार, याकडे सर्वाचं लक्ष लागलेलं आहे. असं असताना आता या पत्रकार परिषदेआधीची शिवसेनेतील आतली बातमी समोर आली आहे. सूत्रांकडून मिळालेल्या माहितीनुसार, आगामी मुंबई महापालिका निवडणुकीआधी शिवसेनेकडून ठाकरे गटाला मोठा झटका देण्यात येण्याची शक्यता आहे. कारण आज ठाकरे गटाचा मुंबईतील एक बडा नेता मुख्यमंत्री एकनाथ शिंदे यांच्या शिवसेनेत दाखल होणार असल्याची माहिती सूत्रांकडून मिळत आहे.
सूत्रांकडून मिळालेल्या माहितीनुसार, मुंबईमध्ये ठाकरे गटाला आज पुन्हा धक्का दिला जाणार आहे. मुंबईतील एक ठाकरे गटाचा माजी नगरसेवक शिवसेनेत (शिंदे गटात) प्रवेश करणार आहे. त्यांच्यासोबत अनेक कार्यकर्तेही शिंदे यांच्या शिवसेनेत प्रवेश करणार आहेत. आगामी मुंबई महापालिकेच्या दृष्टीने हा महत्वाचा प्रवेश मानला जातोय. मुख्यमंत्री एकनाथ शिंदे यांच्या वर्षा या शासकीय निवासस्थानी पक्षप्रवेशाचा कार्यक्रम पार पडणार आहे, अशी देखील माहिती मिळत आहे.
मुख्यमंत्री काय बोलणार?
राज्यात सध्या अनेक राजकीय घडामोडी घडत आहेत. आगामी महापालिका, लोकसभा आणि विधानसभा निवडणुकांच्या पार्श्वभूमीवर या घडामोडींना जास्त महत्त्व प्राप्त झालं आहे. विशेष म्हणजे अनेक घडामोडी या पडद्यामागेही घडत आहेत. तर दुसरीकडे आगामी लोकसभा निवडणुकीच्या जागावाटपावरुन भाजप आणि शिवसेनेत मतभेद असल्याचीदेखील चर्चा आहे. खासदार गजनान कीर्तीकर यांनी तर जाहीरपणे याबाबतची नाराजी व्यक्त केलेली. त्यानंतर आज भाजपने शिवसेनेचे खासदार ज्या मतदारसंघात निवडून आले तिथे संयोजक नेमल्याची माहिती समोर आली आहे. या सगळ्या घडामोडींवर एकनाथ शिंदे काही भाष्य करतात का ते पाहणं महत्त्वाचं ठरणार आहे.
गेल्या काही दिवसांमध्ये अनेकांनी मुख्यमंत्री एकनाथ शिंदे यांच्यावर निशाणा साधला आहे. अनेकांनी एकनाथ शिंदे आणि त्यांच्या आमदार-खासदारांवर टीका केली आहे. शिंदे सरकार पूर्ण कार्यकाळ संपेपर्यंत टिकणार नाही, असा दावा विरोधकांकडून केला जातोय. या दरम्यान, अनेकांनी मुख्यमंत्र्यांवर निशाणा साधलाय. या सर्वांच्या टीकेला आज रात्री आठ वाजेच्या पत्रकार परिषदेत मुख्यमंत्री एकनाथ शिंदे उत्तर देणार असल्याची प्राथमिक माहिती मिळत आहे.
राज्य मंत्रिमंडळाची महत्त्वाची बैठक पार पडली. या बैठकीत शेतकरी सन्मान योजनेला मंजुरी देण्यात आली. या योजनेनुसार राज्य सरकार आता शेतकऱ्यांच्या बँक खात्यात दर वर्षाला 6 हजार रुपये देणार आहे. पंतप्रधान किसान योजनेच्या धर्तीवर ही योजना सुरु करण्यात आली आहे. तसेच शेतकऱ्यांना 1 रुपयात पीकविमा मिळण्याबाबतचा निर्णयही घेण्यात आला आहे. याशिवाय इतर महत्त्वाचे देखील निर्णय घेण्यात आले आहेत. या निर्णयांबद्दलही मुख्यमंत्री आजच्या पत्रकार परिषदेत माहिती देण्याची शक्यता आहे.
