Tukaram Mundhe : बायको, मुलं, नेते की बदलीची ऑर्डर? तुकाराम मुंढे कुणाला घाबरतात? अखेर पहिल्यांदाच म्हणाले…
अन्न आणि औषध प्रशासन आयुक्त तुकाराम मुंढे यांनी भेसळयुक्त पदार्थांविरोधात जोरदार मोहीम राबवली आहे. त्यांना कुणाची भीती वाटते या प्रश्नावर त्यांनी 'मी कुणालाही घाबरत नाही' असे स्पष्ट सांगितले.
अन्न आणि औषध प्रशासनाचे आयुक्त तुकाराम मुंढे यांनी भेसळयुक्त खाद्य पदार्थांविरोधात कारवाईचा धडाकाच लावला आहे. त्यामुळे कँटिनवाल्यांपासून हॉटेलवाल्यांपर्यंत, छोट्या दुकानदारांपासून प्रसिद्ध दुकानदारांपर्यंत सर्वच हादरून गेले आहेत. तुकाराम मुंढे या नावाला भले भले घाबरत आहेत. असं असलं तरी सर्वांना घाम फोडणारे तुकाराम मुंढे कुणाला घाबरतात? तुम्हाला माहीत आहे का? मुंढे यांनाच हा सवाल करण्यात आला. त्यावर त्यांनीही थेट उत्तर दिलं. मी कुणालाच घाबरत नाही, असं त्यांनी बिनधास्त सांगून टाकलं.
एका वृत्तवाहिनीच्या कार्यक्रमात तुकाराम मुंढे यांना हाच सवाल करण्यात आला. तुम्ही कुणाला घाबरता? तुम्हाला कशाची भीती वाटत नाही का? असा सवाल मुंढे यांना करण्यात आला. त्यावर मला कशाची भीती वाटत नाही. मी कुणाला घाबरत नाही, असं तुकाराम मुंढे यांनी स्पष्ट केलं.
तुम्हाला कोण अधिक घाबरतात?
त्यानंतर त्यांना आणखी एक मजेदार प्रश्न विचारला गेला. तुम्हाला सर्वाधिक कोण घाबरतं? अधिकारी की मुलं? त्यावर त्यांनी अधिकारी अधिक घाबरतात असं स्पष्ट केलं. त्यानंतर त्यांनी कधी कधी मीच मुलांना घाबरत असतो, असं मिश्किलपणे सांगितलं. त्यामुळे एकच खसखस पिकली.
कुणाचीच भीती नाही
नेते, वरिष्ठ अधिकारी, पत्नी वा बदलीची ऑर्डर? तुम्हाला सर्वाधिक भीती कशाची वाटते? यावर त्यांनी मला कशाचीच भीती वाटत नाही. मी कुणाला घाबरत नाही. भीतीला डोक्यातून काढून टाका. तुम्ही काही चुकीचं केलं तरच तुम्हाला भीती वाटेल, असं मुंढे यांनी स्पष्ट केलं.
यावेळी त्यांनी सरकारी सेवेत असणाऱ्या अधिकाऱ्यांनाही संदेश दिला. सर्वात आधी तुम्ही तुमची भूमिका आणि जबाबदारी समजून घ्या. सरकारी नोकरीमध्ये उत्तरदायित्व सर्वाधिक असतं. कारण अधिकाऱ्यांना जनतेला थेट उत्तर द्यावं लागतं, असं ते म्हणाले.
ज्या काही सार्वजनिक समस्या समोर येत आहेत, त्या दूर करणं ही अधिकाऱ्यांची जबाबदारी आहे. केवळ प्रशासन चालवणं एवढंच सरकारी अधिकाऱ्याचं काम नाही. तर लोकांना चांगलं आणि सार्थक आयुष्याच्या दिशेने घेऊन जाण्याचं काम अधिकाऱ्यांचं आहे, असं त्यांनी स्पष्ट केलं.
केवळ पगाराच्या दृष्टीने सरकारी सेवेकडे पाहू नका. ही मोठी जबाबदारी आणि समाजाच्या प्रति योगदान देण्याची संधी आहे. सरकारी नोकरीचा उद्देश केवळ नोकरी करणं नाहीये. तर जनतेच्या समस्यांचं समाधान करणं आणि त्यांच्या जीवनात सकारात्मक बदल आणणं हा त्याचा उद्देश आहे, असंही त्यांनी म्हटलंय.
