नागपुरात ‘सैराट’चा थरार! मुलीच्या प्रेमसंबंधामुळे तडीपार बापाचं डोकं फिरलं, तरुणाला धारदार शस्त्राने वार करून संपवल्याचा आरोप

नागपुरात काही आठवड्यांपूर्वी महिलेने एक लाखाची सुपारी देऊन नवऱ्याची हत्या घडवून आणल्याची घटना ताजी असताना आणखी एक भयंकर घटना उघडकीस आली आहे. नागपूरच्या कामठीतील कुंभारे कॉलनीत प्रेमसंबंधाच्या वादातून एकाची हत्या झाल्याची घटना घडली आहे. तडीपार असलेल्या इसमाने मुलीच्या मित्रावर जीवघेणा हल्ला केल्याची घटना उघडकीस आली आहे. त्यानंतर या जीवघेण्या हल्ल्यात जखमी झालेल्या तरुणाचा मृत्यू झाल्याची माहिती समोर आली आहे. या घटनेने कामठी परिसरात खळबळ उडाली आहे.

मिळालेल्या माहितीनुसार, नागपूरच्या कामठीतील कुंभारे कॉलनी परिसरात प्रेमसंबंधाच्या वादातून झालेल्या जीवघेण्या हल्ल्यात गंभीर जखमी झालेल्या तरुणाचा उपचारादरम्यान मृत्यू झाला. जमशेर उर्फ जम्मु मुनीर खान पटेल असे मृत्यू झालेल्या तरुणाचे नाव आहे. जमशेर हा 18 जुलै रोजी रात्री मैत्रिणीला भेटण्यासाठी गेला. त्यावेळी तरुणीचे वडील विजय उर्फ टायसन नामदेव डोंगरे याने धारदार शस्त्राने हल्ला केल्याचा आरोप आहे.

हत्या प्रकरणाची वरिष्ठ पातळीवर चर्चा करावी, पीडित कुटुंबाची मागणी 

विजयने हल्ला केल्यानंतर जखमी जमशेर जीव वाचवण्यासाठी पळण्याचा प्रयत्न केला. त्यावेळी त्याचा पाठलाग करून रिक्षाने धडक दिल्याचा आरोप करण्यात आला आहे. जमशेरवर अतिदक्षता विभागात उपचार सुरू होते. उपचार सुरू असताना त्याचा मृत्यू झाला. मुख्य आरोपी विजय डोंगरे हा तडीपार असतानाही शहरात मुक्तपणे वावरत असल्याचा आरोप करण्यात येत आहे. या प्रकारानंतर नागरिकांनी पोलिसांच्या कार्यपद्धतीवर प्रश्न उपस्थित केले आहेत. आरोपीला तातडीने अटक करून कठोर शिक्षा करावी आणि संपूर्ण प्रकरणाची वरिष्ठ पातळीवर चौकशी करावी, अशी मागणी मृत तरुणाच्या कुटुंबांनी केली आहे.

नागरिकांमध्ये भीतीचं वातावरण

नागपूरच्या कामठी परिसरात हत्येची घटना घडल्याने नागरिकांमध्ये भीतीचं वातावरण पसरलं आहे. तरुणाच्या हत्येने सर्वसामान्यांकडून सुरक्षेची मागणी केली जात आहे. तर वाढत्या गुन्हेगारी रोखण्यासाठी पोलिसांनी कठोर पावले उचलावीत, असंही नागरिकांनी म्हटलं आहे. तसेच जमशेऱ हत्या प्रकरणात कठोर कारवाईची मागणी देखील कामठीतील नागरिकांकडून केली जात आहे.