Nashik | दुष्काळी येवल्याची सिंचन क्षमता वाढणार; 21 योजनांचा मार्ग मोकळा, किती निधी मंजूर?
येवला तालुक्यातील देवानासह 21 योजनांवरील स्थगिती उठविण्यात आली आहे. त्यामुळे या दुष्काळी तालुक्यातील सिंचन क्षमता अधिक वाढणार आहे.
नाशिकः एक आनंदाची बातमी. नाशिक जिल्ह्यातल्या (Nashik) येवला तालुक्यातील देवनासह 21 योजनांना प्रशासकीय मान्यता मिळूनही कोरोनाच्या निर्बंधांमुळे 23 मे 2021 रोजी महामंडळाकडून राज्यातील सर्व योजनांच्या निविदा प्रक्रियेस स्थगिती देण्यात आलेली होती. अखेर ही स्थगिती महामंडळाने उठविली असून, येवला तालुक्यातील देवना साठवण तलावासह 21 योजनांचा मार्ग मोकळा झाला आहे. या सर्व योजनांसाठी शासनाकडून 28 कोटी 15 लाख रुपयांचा निधी मंजूर असून, त्याची निविदा प्रक्रिया लवकरच राबविण्यात येणार आहे. या योजना राबविण्यासाठी राज्याचे अन्न, नागरी पुरवठा व ग्राहक संरक्षण मंत्री तथा नाशिक जिल्ह्याचे पालकमंत्री (Guardian Minister) छगन भुजबळ (Chhagan Bhujbal) यांनी विशेष प्रयत्न केले आहेत.
देवनाचा कसा होईल फायदा?
देवना साठवण तलाव ही येवला तालुक्यात खरवंडी व देवदरी गावाच्या जवळ दोन मोठ्या नाल्यांच्या संगमावर माणिकपुंज मध्यम प्रकल्पाच्या पाणलोट क्षेत्रामध्ये आहे. येवला तालुक्यातील देवदरी, खरवंडी, राहडी, कोळम खु. या गावाच्या शिवारातील शेतीस उपसा पद्धतीने सिंचनाचा लाभ होणार आहे. तसेच, वन्य प्राण्यांच्या पिण्यासाठी व रोपवाटीकेसही लाभ होणार आहे. या योजनेच्या माध्यमातून 2.08 दलघमी (73.44 दलघफू) पाणी वापरासाठी पाणी उपलब्धता उपलब्ध होणार आहे.
किती भू-संपादन?
देवना साठवण तलाव योजनेसाठी संयुक्त मोजणीनुसार वैजापूर तालुक्यातील 13.00 हेक्टर व येवला तालुक्यातील 44.00 हेक्टर अशी एकूण 57.०० हेक्टर क्षेत्र संपादित होत आहे. त्यापैकी 55.75 हेक्टर वनक्षेत्र असून 1.25 हेक्टर क्षेत्र हे खासगी आहे. या योजनेची एकूण किंमत 15 कोटी 65 लक्ष असून योजनेच्या बुडीत क्षेत्रापैकी 57 हेक्टर क्षेत्र संपादित करण्यात आलेले आहे. या योजनेची स्थगिती उठल्याने लवकरच या योजनेची निविदा प्रक्रिया राबविण्यात येऊन कामाला सुरुवात होणार आहे.
किती निधी मिळाला?
येवला तालुक्यातील देवानासह 21 योजनांवरील स्थगिती उठविण्यात आली आहे. यामध्ये राजापूर-1 गेटेड सि. कॉ. बंधाऱ्यासाठी 61 लाख 55 हजार, राजापूर – 2 गेटेड सि. कॉ. बंधाऱ्यासाठी 62 लाख 9 हजार, राजापूर – 3 गेटेड सि. कॉ. बंधाऱ्यासाठी 61 लाख 18 हजार, राजापूर – 4 गेटेड सि. कॉ. बंधाऱ्यासाठी 67 लाख 40 हजार, राजापूर – 5 गेटेड सि. कॉ. बंधाऱ्यासाठी 60 लाख 57 हजार, राजापूर – 6 गेटेड सि. कॉ. बंधाऱ्यासाठी 62 लाख, राजापूर – 7 गेटेड सि. कॉ. बंधाऱ्यासाठी 60 लाख 53 हजार, राजापूर – 8 गेटेड सि. कॉ. बंधाऱ्यासाठी 60 लाख 59 हजार निधी मंजूर आहे.
बंधाऱ्यांसाठी किती तरतूद?
ममदापूर 4 गेटेड सि. कॉ. बंधाऱ्यासाठी 69 लाख 91 हजार, ममदापूर 5 गेटेड सि. कॉ. बंधाऱ्यासाठी 70 लक्ष 11 हजार, ममदापूर 6 गेटेड सि. कॉ. बंधाऱ्यासाठी 50 लाख 34 हजार, ममदापूर 7 गेटेड सि. कॉ. बंधाऱ्यासाठी 69 लाख 46 हजार, ममदापूर 8 गेटेड सि. कॉ. बंधाऱ्यासाठी 52 लाख 13 हजार, खरवंडी 5 गेटेड सि. कॉ. बंधाऱ्यासाठी 60 लक्ष 63 हजार, खरवंडी 6 गेटेड सि. कॉ. बंधाऱ्यासाठी 53 लाख 54 हजार, राहडी 1 गेटेड सि. कॉ. बंधाऱ्यासाठी 97 लाख 52 हजार, राहडी 2 गेटेड सि. कॉ. बंधाऱ्यासाठी 50 लाख 40 हजार, सोमठाणजोश 1 गेटेड सि. कॉ. बंधाऱ्यासाठी 61 लाख 22 हजार, सोमठाणजोश 2 गेटेड सि. कॉ. बंधाऱ्यासाठी 60 लाख 80 हजार, सोमठाणजोश 3 गेटेड सि. कॉ. बंधाऱ्यासाठी 58 लाख 22 हजार या योजनांसाठी 12 कोटी 50 लाख 18 हजार रुपये निधी मंजूर असून, लवकरच निविदा प्रक्रिया राबविण्यात येऊन कामास सुरुवात होणार आहे. त्यामुळे येवला तालुक्यातील सिंचन क्षमता अधिक वाढणार आहे.
इतर बातम्याः
Nashik | महापालिकेच्या कोषागार विभागात घोटाळा, नियमित भरण्यावरच डल्ला, नेमके प्रकरण काय?
