Nashik Vidhan Parishad Election : नाशिकमध्ये मतमोजणीआधी एकनाथ शिंदे शिवसेनेच्या उमदेवाराचा छगन भुजबळ यांच्यावर गंभीर आरोप

विधान परिषदेच्या 17 जागांसाठी मागच्या आठवड्यात निवडणूक झाली होती. राज्यातील स्थानिक स्वराज्य संस्थांमधून विधान परिषदेवर सदस्य निवडले जाणार आहेत. 17 पैकी 6 जागांवर आधीच महायुतीच्या उमेदवारांची बिनविरोध निवड झाली आहे. आज उर्वरित 11 जागांचा निकाल लागणार आहे. त्यासाठी सकाळी 8 वाजल्यापासून मतमोजणी सुरु होणार आहे. या विधान परिषदेच्या 17 जागांमध्ये नाशिक आणि जळगावच्या जागेची सर्वाधिक चर्चा झाली. कारण या दोन मतदारसंघात बंडखोरी झाली होती. महायुती एकत्र ही निवडणूक लढवत असल्याने नाशिकची जागा एकनाथ शिंदेच्या शिवसेनेकडे गेली. शिवसेनेने इथून नरेंद्र दराडे यांना उमेदवारी दिली. ते महायुतीचे अधिकृत उमेदवार होते. पण भाजपच्या गणेश गीते आणि गोकुळे गीते यांनी बंडखोरी करुन उमेदवारी दाखल केली.

त्यामुळे महायुतीच्या गोटात टेन्शन वाढलं होतं. गणेश गीते यांची भाजप नेत्यांनी समजूत काढल्यानंतर त्यांनी माघार घेतली. पण गोकुळ गीते त्यांच्या उमेदवारी ठाम राहिले. हे दोघे बंधु आहेत. शिवसेनेकडून उदय सामंत आणि भाजपकडून गिरीश महाजन यांना, गोकुळ गीते यांची समजूत काढण्यासाठी बरीच मेहनत घ्यावी लागली. गोकुळ गीते यांनी उमेदवारी मागे घेण्याची वेळ निघून गेलेली होती. त्यामुळे त्यांनी नरेंद्र दराडे यांना पाठिंबा जाहीर करावा अशी महायुतीची मागणी होती. गोकुळ गीते यांनी पाठिंबा दिला नाही. पण प्रचार थांबवून एकप्रकारे महायुतीची मदत केली. गोकुळ गीते यांचं म्हणणं होतं की, “माझा भाजपशी संबंध नाही. माझे बंधु गणेश गीते भाजपमध्ये आहेत. त्यामुळे मी निवडणूक लढवू शकतो”

मतमोजणी सुरु होण्यापूर्वी महायुतीतील बेबनाव

दरम्यान आता नाशिकमध्ये मतमोजणी सुरु होण्यापूर्वी महायुतीतील बेबनाव समोर आला आहे. ‘छगन भुजबळ यांनी आपल्याला मदत केली नाही’ असा गंभीर आरोप महायुतीचे उमेदवार नरेंद्र दराडे यांनी केला आहे. “येवल्याची आठही मत आपल्याला पडली नाहीत. समीर भुजबळ कॅम्प मध्ये होते. अनेक बैठका झाल्या, नेत्यांनी आदेश दिले, तरीदेखील त्यांनी असे का केले माहीत नाही” असा नरेंद्र दराडे यांनी छगन भुजबळांवर थेट आरोप केला. कितीही मतांची फाटा फूट झाली, तरी आपणच विजय होणार असा विश्वास नरेंद्र दराडे यांनी व्यक्त केला.