Eknath Shinde : शिवसेना वाढवण्यासाठी एकनाथ शिंदेंची नवीन खेळी, तालुकाध्यक्षांना नव्याकोऱ्या कार देणार आणि..
Eknath Shinde Shivsena: नाशिक जिल्ह्यात शिंदे सेना पक्ष संघटना बळकट करण्यासाठी आणि पक्ष वाढीसाठी मैदानात उतरली आहे. त्यासाठी तालुकाध्यक्षांना नव्याकोऱ्या कार दिल्या जाणार आहेत. अजून काय आहे पक्षाची योजना?
नाशिक जिल्ह्यात संघटनवाढीसाठी शिंदेसेनेची नवी रणनीती समोर आली आहे. आगामी जिल्हा परिषद, पंचायत समिती निवडणुकांवर पक्षाचा फोकस आहे. नाशिकमध्ये भाजपसोबत शिंदे सेनेची कुरबुर जुनीच आहे. आता पक्षा संघटन बळकट करण्यासाठी आणि पक्ष वाढीसाठी शिवसेना मैदानात उतरली आहे. त्यासाठी खास रणनीतीही आखण्यात आली आहे. पक्ष नेत्यांना, कार्यकर्त्यांना बळ देण्यासाठी त्यांना नव्याकोऱ्या कार देण्यात येणार आहे. त्यामुळे जिल्ह्यातील ग्रामीण भागातही मांड ठोकता येणार आहे. काय आहे याविषयीची अपडेट?
तालुकाध्यक्षांच्या दिमतीला वाहनं
शिंदे सेनेने पक्ष संघटन मजबूत करण्यासाठी मोठा निर्णय घेतला आहे. तालुकाध्यक्षांना पक्षाच्या कामासाठी मोटारी देण्यात येणार आहे. आमदार सुहास कांदे यांच्या पुढाकाराने १३ मोटारींची खरेदी करण्यात आली आहे. यामुळे ग्रामीण भागातही पक्षाला मजबूत जनाधार मिळवून देण्यासाठी पदाधिकाऱ्यांना दौरे करता येणार आहे. त्यांना पक्ष वाढीचे काम करता येणार आहे. पक्षाच्या कामासाठी त्यांना दूरचा प्रवास करता येणार आहे. पक्षाकडूनच ही तरतूद करण्यात येत असल्याने कार्यकर्ते, पदाधिकाऱ्यांनी आनंद व्यक्त केला आहे.
या मोटारींवर एकनाथ शिंदे, श्रीकांत शिंदे यांची छायाचित्रे लावण्यात आली आहेत. शिवसेना आपल्या दारी अभियानातून गावागावात संपर्क साधतील. तालुकाध्यक्षांवर घरोघरी पक्ष पोहोचवण्याची जबाबदारी सोपवण्यात आली आहे. मोटारींच्या वापराचा दैनंदिन अहवाल घेतला जाणार आहे. श्रीकांत शिंदेंच्या उपस्थित पुढील आठवड्यात लोकार्पणाची शक्यता वर्तवली जात आहे. जिल्हा परिषदेत भगवा फडकवण्यासाठी शिंदेच्या शिवसेनेची जोरदार तयारी सुरू असल्याचे दिसून येते.
बच्चू कडू आणि खासदार डॉ. अनिल बोंडे यांची भेट
दरम्यान तिकडे अमरावतीमध्ये आमदार बच्चू कडू आणि खासदार डॉ.अनिल बोंडे यांची भेट झाली. या भेटीमुळे अमरावतीच्या राजकीय वर्तुळात चर्चांना उधाण आले आहे. बोंडे यांच्या कार्यक्रमात बच्चू कडूंची उपस्थितीने लक्ष वेधले. मागील काही महिन्यांपूर्वी बच्चू कडू आणि अनिल बोंडे यांच्यामध्ये टीका टिपणी सुरू होती. शिवसेना शिंदे गटाचे आमदार बच्चू कडू आणि भाजपचे राज्यसभा खासदार डॉ.अनिल बोंडे यांची भेट झाली आहे. डॉ. अनिल बोंडे यांच्या निवासस्थानी आयोजित कार्यक्रमाला आमदार बच्चू कडू यांनी हजेरी लावली. गेल्या काही काळातील राजकीय घडामोडी आणि पार्श्वभूमीवर, या दोन बड्या नेत्यांमधील ही भेट अत्यंत महत्त्वाची मानली जात आहे.
