नाशिकः शेळ्यां, वासरावर ताव मारणारा बिबट्या जेरबंद…नागरिकांनी सोडला सुटकेचा निश्वास…महिनाभरात तीन बिबटे पिंजऱ्यात

नाशिकः नाशिक (nashik) जिल्ह्यातल्या मालेगाव (Malegaon) जवळच्या वडगाव परिसरात दहशत माजविणाऱ्या बिबट्याला (Leopard) जेरबंद करण्यात वनविभागाला यश आले आहे. त्यामुळे घाबरलेल्या शेतकऱ्यांनी सुटकेचा निश्वास सोडला आहे. (Leopard caught in Nashik, relief to citizens)

वडगाव परिसरात गेल्या पंधरा दिवसांपासून बिबट्याचा वावर होता. बिबट्याने 10 सप्टेंबर रोजी एका शेतातील गाईच्या वासरावर ताव मारला होता. त्यानंतर तो परिसरात अनेक ठिकाणी दिसून आला. बिबट्याने टाकेदवेगाव परिसरातील येल्याचीमेट शिवारात दोन मेंढपाळांच्या दोन शेळ्या फस्त केल्या होत्या. गेल्या चार दिवसांपूर्वी हा प्रकार घडला. हे मेंढपाळ शेळ्या चारण्यासाठी रानात गेले होते. त्यांना घराकडे परतायला उशीर झाला. गावी येताना थोडा अंधारही पडला होता. नेमक्या याच यावेळी बिबट्याने शेळ्यांवर हल्ला चढवला. मेंढपाळांनी शेळीच्या ओरडण्याचा आवाज ऐकून धाव घेतली. बिबट्यावर दगडांचा मारा करून पिटाळून लावले. मात्र, जखमी झालेल्या शेळीने जीव सोडला. बिबट्याच्या वावराने पंचक्रोशीतील शेतकऱ्यांमध्ये भीतीचे वातावरण होते. मशागतीच्या कामासाठी शेतात जायचे कसे, असा प्रश्न त्यांच्यासमोर होता. त्यामुळे शेतकऱ्यांनी कृषिमंत्री दादा भुसे यांच्या भेट घेत, बिबट्याचा बंदोबस्त करावा, अशी मागणी केली होती. मंत्र्यांनी वनविभागाच्या अधिकाऱ्यांना परिसरात पिंजरा लावण्याच्या सूचना केल्या होत्या. त्यानंतर वनविभागाने वडगाव परिसरात पिंजरा लावला होता. या पिंजऱ्यात बिबट्या सापडला. त्यामुळे शेतकऱ्यांना मोठा दिलासा मिळालाआहे.

एकापाठोपाठ एक…

गेल्या अनेक दिवसांपासून नाशिक जिल्ह्यात दोन बिबट्यांचा मुक्तसंचार सुरू होता. त्यापैकी एका बिबट्यासाठी बेलगाव कुऱ्हे येथील एका पोल्ट्री शेडजवळ नुकतेच पकडण्यात आले. त्यानंतर दोनच दिवसात याच परिसरात दुसरा बिबट्याही पकडण्यात आला होता. या नंतर पुन्हा एकदा बिबट्याचे दर्शन झाले होते. आता वडगाव परिसरात हा तिसरा बिबट्या जेरबंद करण्यात वनविभागाला यश आले आहे. त्यामुळे नाशिक जिल्ह्यातील शेतकऱ्यांनी सुटकेचा निश्वास सोडला आहे.

पर्यावरण तज्ज्ञांचा इशारा

बिबट्यासारखा हिंस्त्र प्राणी वारंवार गाव आणि शहराकडे धाव घेण्याचे प्रमाण गेल्या काही वर्षांत वाढले आहे. मानवाने प्राण्यांचा अधिवास बळकावला. जंगलांची अक्षरशः कत्तल केली. त्यामुळे पर्यावरणाचे संतुलन बिघडले आहे. पर्जन्य चक्रात प्रचंड बदल झाले आहेत. एकाचवेळी अतिवृष्टी आणि एकाचवेळी दुष्काळाचा अनुभव आपण घेत आहोत. निसर्गाला ओरबाडने मानवाने थांबवले नाही, तर यापेक्षा भयंकर परिणामांना सामोरे जावे लागेल, असा इशारा पर्यावरण तज्ज्ञ देत आहेत. (Leopard caught in Nashik, relief to citizens)

इतर बातम्याः

नाशिकः सांडपाण्यात वाहून गेला अन् नाल्याच्या जाळीत अडकला…गंगाघाटावर पोहणे पडले महागात

चंचल वारा, या जलधारा…नाशिकमध्ये ऊन-पावसाचा खेळ…पुढचे दोन दिवस सोहळा!