ना गाडी ना घोडा, नवरदेवाने लाडक्या नवरीला नेले असे की पंचक्रोशीत होते कौतुक

उमेश पारीक, प्रतिनिधी, लासलगाव, नाशिक : लग्न धुमधडाक्यात झाले पाहिजे, असा बहुतेकांचा आग्रह असतो. त्यासाठी ऐपतीप्रमाणे प्रत्येकजण खर्च करतो. गाडी किंवा घोडा हे लग्नात सहसा असतेच. श्रीमंत लोकं हेलिकॅप्टरने नवरीला घेऊन जातात. पण, एका युवकाने चक्क बैलगाडीतून नवरीला घेऊन निघाला.या कृतीचं सर्वत्र कौतुक होत आहे. लग्नसराईत वेगवेगळ्या शक्कल लावत नवरदेव आपल्या नवरींना आपल्या घरी घेऊन जात असतात.

निफाड तालुक्यातील उंबरखेड येथील नवरदेवाने चक्क बिदाईनंतर आपल्या लाडक्या नवरीला बैलगाडीत बसून आपल्या घरी नेले. या अनोख्या बिदाईची सर्वत्र मोठी चर्चा झाली आहे.

नवरीला नेले बैलगाडीतून.. pic.twitter.com/bGZys3JLdQ

— Govind Hatwar (@GovindHatwar) June 17, 2023

नवरीला बसवले बैलगाडीत

निफाड तालुक्यातील उंबरखेड येथील रमेश रघुनाथ गवळी यांचे चिरंजीव अक्षय तसेच दत्तात्रेय प्रभाकर कागदे यांची मुलगी हिनल या दोघांचा शुभविवाह संपन्न झाला आहे. लग्नात दिवसभर लग्नाचे विविध कार्यक्रम झाले. त्यानंतर ज्यावेळेस बिदाईची वेळ आली त्यावेळी वऱ्हाडी मंडळींनी सजवलेल्या बैलगाडीत नवरदेवाने आपल्या नवरीला बसवत आपल्या घरी घेऊन गेला.

अनोखी लग्न पत्रिका छापली

दुसरीकडे, नगरच्या जाधव कुटुंबीयांनी अनोखी लग्न पत्रिका छापली आहे. पत्रिकेमध्ये नातेवाईकांची नावे टाकण्यापेक्षा त्यांनी सरकारच्या योजनांची माहिती दिली आहे. यामध्ये आयुष्यमान भारत, मुख्यमंत्री वैद्यकीय सहाय्यता निधी यासारख्या महत्वाच्या आरोग्य योजनांसह इतरही योजनांची माहिती छापण्यात आली आहे.

शेकडो कुटुंबांना आपण लग्नाची पत्रिका पोहचवतो. या माध्यमातून या योजनांची माहिती लोकांपर्यंत पोहोचल्यास त्याचा लोकांना अधिक फायदा होवू शकतो ही भूमिका जाधव कुटुंबाने व्यक्त केलीय.

असे हे लग्नसोहळे सर्वत्र चर्चेचा विषय ठरतात. एकीकडं बैलगाड्या कमी होत असताना अजूनही काही जण बैलगाडीतून नवरीला घेऊन जातात. दुसरीकडे लग्नाची अनोखी पत्रिका छापून नवदाम्पत्याने सरकारी योजनांची मदत केली आहे. या दोन्ही घटनांची चर्चा गावात आहे.