मोठी बातमी! सुनील तटकरेंनी घेतली CM फडणवीसांची भेट, राजकारणात नेमकं चाललंय तरी काय?

राज्याच्या राजकारणातून मोठी बातमी समोर आली आहे. राष्ट्रवादीत अंतर्गत वादाची चर्चा सुरु असताना आज प्रदेशाध्यक्ष सुनील तटकरे यांनी राज्याचे मुख्यमंत्री देवेंद्र फडणवीस यांची भेट घेतली आहे. त्यामुळे राजकीय चर्चांना उधाण आले आहे. मुख्यमंत्री फडणवीस यांच्या वर्षा या निवासस्थानी या दोन्ही नेत्यांची भेट झाल्याची माहिती समोर आले आहे. काही दिवसांपूर्वी खासदार पार्थ पवार यांनीही फडणवीसांची भेट घेतली होती, त्यामुळे आता या भेटीला महत्त्व प्राप्त झाले आहे. याबाबत सविस्तर माहिती जाणून घेऊयात.

सुनील तटकरे यांनी घेतली फडणवीसांची भेट

समोर आलेल्या माहितीनुसार, राष्ट्रवादीचे प्रदेशाध्यक्ष सुनील तटकरे यांनी आज राज्याचे मुख्यमंत्री देवेंद्र फडणवीस यांची भेट घेतली आहे. वर्षा या शासकीय निवासस्थानी या दोन्ही नेत्यांची भेट झाली आहे. यावेळी दोन्ही नेत्यांमध्ये नेमकी काय चर्चा झाली याबाबत माहिती समजू शकलेली नाही. दोन दिवसांपूर्वी पार्थ पवार यांनीही फडणवीसांची भेट घेतली होती, त्यानंतर आता तटकरेही फडणवीसांच्या भेटीला पोहोचल्याने राष्ट्रवातीत नेमकं काय सुरू आहे? असा प्रश्न उपस्थित होत आहे.

पक्षात अंतर्गत मतभेद?

सूत्रांनी दिलेल्या माहितीनुसार, राष्ट्रवादीच्या राष्ट्रीय अध्यक्षा सुनेत्रा पवार आणि अनेक वरिष्ठ नेत्यांमध्ये मतभेद असल्याचीही माहिती समोर आली आहे. राष्ट्र्वादीने निवडणूक आयोगाला दिलेल्या पत्रात अनेक वरिष्ठ नेत्यांच्या नावापुढे पदांचा उल्लेख नसल्याचे समोर आले होते. सुनील तटकरे यांच्या नावापुढे प्रदेशाध्यक्ष पदाचा तर प्रफुल्ल पटेल यांच्या नावापुढे कार्यध्यक्ष असा उल्लेख नव्हता. त्यामुळे राजकीय चर्चांना उधाण आले होते. मात्र त्यानंतर पक्षाकडून सुनील तटकरे हे राष्ट्रवादी काँग्रेस पक्षाचे प्रदेशाध्यक्ष आहेत आणि ते राहणार आहेत. प्रफुल्ल पटेल हे कार्याध्यक्ष आहेत आणि कायम राहणार आहेत अशी माहिती देण्यात आली होती.

पक्षात सर्वकाही आलबेल

राष्ट्रवादीचे प्रवक्ते सुरज चव्हाण यांनी याबाबत बोलताना म्हटले होते की, राष्ट्रवादी पक्षाच्या पदाधिकारी कार्यकर्ते यांना मी सांगतो की, कोणतीही चलबिचल कोणतीही नाराजी नाही. अशा बातम्या काही लोक जाणीवपूर्वक पसरवत आहेत. सुनेत्रा पवार वहिणी साहेब, प्रफुल्ल पटेल साहेब, सुनिल तटकरे साहेब हे पक्षाचे नेते आहेत. ज्या माध्यमांमध्ये बातम्या येत आहेत त्या पेरल्या जात आहेत. ज्या बातम्या दाखवल्या जात आहे त्या सर्व निराधार आहेत.