Anti-Naxal Campaign : गडचिरोलीत 3 जहाल नक्षलींना अटक, 10 लाख रुपयांचे होते बक्षीस
दोघांवरही प्रत्येकी 4 लाख रुपये बक्षीस जाहीर करण्यात आले होते. अर्जुन ऊर्फ महेश रैनु नरोटे याच्यावर दोन लाख रुपयांचे बक्षीस होते. या तीन नक्षलवाद्यांवर एकूण दहा लाख रुपयांचे बक्षीस होते.
गडचिरोली : गडचिरोली जिल्ह्यातील उपविभाग असलेला भामरागड अंतर्गत येणाऱ्या पोमके लाहेरी हद्दीतील गोपनीय माहिती पोलिसांना मिळाली. विशेष अभियान पथक (सी-60) व सीआरपीएफ बटालियन 37 चे जवान संयुक्त नक्षल विरोधी अभियान (Anti-Naxal Campaign) कोयार जंगल परिसरात राबवित होते. दोन जहाल नक्षलवाद्यांना अटक करण्यात आली. उपविभाग हेडरी अंतर्गत पोमके गट्टा (जां) हद्दीतील झारेवाडा जंगल परिसरात विशेष अभियान पथकाचे जवान नक्षलविरोधी अभियान राबवित होते. एका जहाल नक्षलवाद्यांस अटक करण्यात आले. गडचिरोली पोलीस दलाचे (Police Force) जवानांना यश प्राप्त झाले आहे. सदर नक्षलवाद्यांना दोन वेगवेगळ्या घटनांमध्ये अटक करण्यात आली. कोयार जंगल (Koyar Jungle) परिसरामध्ये अटक करण्यात आलेल्या जहाल नक्षलवाद्यांमध्ये रमेश पल्लो व तानी ऊर्फ शशी चमरु पुंगाटी यांचा समावेश आहे. दोघांवरही प्रत्येकी 4 लाख रुपये बक्षीस जाहीर करण्यात आले होते. अर्जुन ऊर्फ महेश रैनु नरोटे याच्यावर दोन लाख रुपयांचे बक्षीस होते. या तीन नक्षलवाद्यांवर एकूण दहा लाख रुपयांचे बक्षीस होते.
आतापर्यंत 57 जहाल नक्षलवाद्यांना अटक
गडचिरोली पोलीस दलाने राबविलेल्या प्रभावी नक्षलविरोधी अभियानामुळे 2021-22 या दोन वर्षाच्या कालावधीत आतापर्यंत एकूण 57 जहाल नक्षलवाद्यांना अटक करण्यात गडचिरोली पोलीस दलास यश मिळाले आहे. सदरची कारवाई पोलीस अधीक्षक अंकित गोयल मार्गदर्शनाखाली अपर पोलीस अधीक्षक सोमय मुंडे, अपर पोलीस अधीक्षक समीर शेख, अपर पोलीस अधीक्षक अहेरी अनुज तारे यांच्या नेतृत्वात पार पडली.
नक्षली चळवळीला धक्का
पोलीस अधीक्षक अंकित गोयल यांनी नक्षलवाद्यांच्या हिंसक कारवायांवर अंकुश लावण्यासाठी नक्षलविरोधी अभियान तीव्र केले. नक्षलवादाची हिंसक वाट सोडून आत्मसमर्पण करुन सन्मानाने जीवन जगण्याचे आवाहन केले आहे. तीन नक्षलवाद्यांना अटक करण्यात आल्यानं नक्षली चळवळीला मोठा धक्का मानला जात आहे.
