दहावी उत्तीर्ण झालेली विद्यार्थिनी प्रमाणपत्र घेण्यासाठी शाळेत गेली, त्यानंतर घडली ही धक्कादायक घटना

प्रतिनिधी, गडचिरोली : दहावी झाल्याने ती आनंदित होती. प्रमाणपत्र घेण्यासाठी म्हणून शाळेत गेली. पण, घरी परतली नाही. त्यामुळे कुटुंबीयांना चिंता वाटू लागली. दुसऱ्या दिवशी सकाळी ती भेदरलेल्या अवस्थेत गावी परतली. रात्री घडलेला प्रसंग तिने कुटुंबीयांना सांगितला. तेव्हा कुटुंबीयांच्या पायाखालची जमीन सरकली. एकीकडे दहावी उत्तीर्ण झाल्याचा आनंद तर दुसरीकडे घडलेला धक्कादायक प्रसंग यामुळे ती हादरली होती. कुटुंबीयांना पोलिसांत जाऊन तक्रार केली.

विद्यार्थिनीला बळजबरी पाजली दारू

दहावी उत्तीर्ण झाल्यानंतर प्रमाणपत्र घेण्यासाठी शनिवारी विद्यार्थिनी शाळेत गेली होती. त्यानंतर निहाल कुंभारे याने तिला एका खोलीवर नेले. संध्याकाळी रोशन गोडसेलवार आणि निहाल कुंभारे यांनी त्या मुलीला बळजबरीने दारू पाजून तिच्यावर अत्याचार केला.

पहाटे चौकात सोडून दिले

त्यानंतर पहाटे तिला येथील चौकात सोडून दिले. भेदरलेल्या मुलीने चौकात आपल्यावरील अत्याचाराची जोरजोरात वाच्यता केली. त्यानंतर ती आपल्या गावी गेली आणि कुटुंबीयांना घटना सांगितली. कुटुंबीयांनी पीडित मुलीसह पोलीस ठाण्यात जाऊन तक्रार नोंदवली.

पोलिसांनी पीडितेचे जबाब नोंदवून तपास अहेरी पोलिसांकडे वर्ग केला. रविवारी रात्री उशिरा अहेरी पोलिसांनी आरोपी रोशन गोडसेलवार व निहाल कुंभारे यांच्यावर गुन्हा दाखल करुन त्यांना अटक केली.

दोन्ही युवकांना अटक

दहावी उत्तीर्ण झाल्यानंतर प्रमाणपत्र घेण्यासाठी शाळेत गेलेल्या या एका अल्पवयीन आदिवासी विद्यार्थिनीवर दोन युवकांनी अत्याचार केल्याची घटना गडचिरोली जिल्ह्यात उघडकीस आली आहे. याप्रकरणी अहेरी पोलिसांनी दोन्ही युवकांना अटक केली आहे. रोशन गोडसेलवार (वय २३) रा. आलापल्ली आणि निहाल कुंभारे (वय २४) रा. जीवनगट्टा, ता. एटापल्ली, अशी आरोपींची नावे आहेत. पीडित मुलगी एका शाळेत शिकत होती.