Anchal Mamidwar: सक्षमचं घर का सोडलं? आंचल मामीडवार पहिल्यांदाच समोर… सक्षमच्या लहान भावाचे नाव घेत धक्कादायक खुलासा
Nanded Anchal Mamidwar Case: सक्षम ताटे याच्या मृतदेहाशी लग्न करणारी त्याची प्रेयसी आंचल मामीडवार अचानक त्याचे घर सोडून गेल्याने एकच चर्चा सुरू होती. आता याप्रकरणात समाज माध्यमावरील चर्चेनंतर आंचल मामिडवार हिने समोर येत धक्कादायक खुलासा केला आहे.
Anchal Mamidwar-Saksham Tate Nanded: नांदेडमधील ऑनर किलिंग प्रकरणातील आंचल मामीडवार हिने प्रियकर सक्षम ताटे याच्या मृतदेहाशी लग्न केले होते. प्रेमसंबंधातून सक्षम ताटेचा गेल्या वर्षी गोळ्या घालून खून करण्यात आला होता. या रक्तरंजित प्रेम कहाणीने राज्य हादरले होते. तर आंचल हिने घरांच्याच्या विरोधात साक्ष दिली होती. स्वतःच्या कुटुंबियांविरोधात गुन्हा दाखल केला होता. सक्षमच्या घरी कायमचं राहणार असल्याचे म्हटले होते. पण काही दिवसांपूर्वी सक्षमच्या आईने प्रसारमाध्यमांसमोर येत आंचल घर सोडून निघून गेल्याचे सांगितले. त्यानंतर याप्रकरणाची चर्चा सुरू झाली. आंचल अशी अचानक घर सोडून का गेली? प्रेमाच्या आणाभाका कशी विसरली अशी सोशल मीडियावर चर्चा झाली. आता आंचल मामीडवार हिने माध्यमांसमोर येत घर सोडण्याविषयी धक्कादायक खुलासा केला आहे.
आजीकडे जाण्याचा बहाणा करून सोडले घर
सक्षम ताटेच्या आईने एका मराठी दैनिकाला मुलाखत दिली होती. त्यात संगिता ताटे यांनी आंचल अचानक घर सोडून गेल्याची माहिती दिली होती. आजीकडे जाण्याचा बहाणा करत तिने घर सोडल्याचे संगिता ताटे म्हणाल्या होत्या. त्यानंतर समाज माध्यमांवर उलट सुलट चर्चा सुरू झाली होती. काहींनी आंचलची बाजू उचलून धरत तिला तिचा निर्णय घेण्याचा पूर्ण अधिकार असल्याचे म्हटले होते. तर याप्रकरणी आता आंचल मामीडवार हिने धक्कादायक खुलासा केला आहे.
आंचलचा धक्कादायक खुलासा
या प्रकरणात आता आरोप प्रत्यारोप सुरू झाले आहेत. आजीकडे जाण्याच्या बहाण्याने आंचलने घर सोडल्याचे सक्षम ताटे याच्या आईचे म्हणणे आहे. तर सक्षमचा लहान भाऊ आपल्याशी गैरवर्तन करत असल्याचा गंभीर आरोप आंचल मामीडवार हिने केला आहे. सक्षमचा लहान भाऊ गैरवर्तन करत असल्यानेच आपण घर सोडण्याचा निर्णय घेतल्याचे प्रत्युत्तर आंचल मामीडवार हिने दिले आहे. तर सक्षमला न्याय मिळवून देण्यासाठी आपण एकटेच लढत असल्याचा दावाही तिने केला. आता या प्रकरणाला अजून वेगळी दिशा मिळाल्याचे समोर आले आहे. आता आरोप-प्रत्यारोपाच्या फैरी तीव्र झाल्याचे समोर आले आहे. 27 नोव्हेंबर 2025 रोजी नांदेड शहरातील इतवारा परिसरात सक्षम ताटे याच्यावर गोळीबार करण्यात आला होता आणि फरशीचे घाव घालून त्याचा खून करण्यात आला होता. आंचलचे प्रेमसंबंधी तिच्या कुटुंबियांना मान्य नव्हते. या घटनेपासून आंचल ही सक्षमच्या घरीच राहत होती.
