रोज रोज दारू पिऊन घराचं वाटोळं करू नका, पत्नीने टोकले अन् पतीने थेट… हसतखेळता संसार उघड्यावर

पिंपरी-चिंचवड शहरात काही दिवसांपूर्वीच विषारी दारू प्यायल्याने १२ निष्पाप नागरिकांचा मृत्यू झाल्याची घटनेमुळे संपूर्ण शहर सुन्न झाले आहे. ही घटना ताजी असताना आता दारुच्या व्यसनापोटी एका कौटुंबिक वादातून पतीने आपले जीवन संपवल्याची धक्कादायक घटना चिंचवड परिसरातून समोर आली आहे. रोज रोज दारू पिऊन घर उद्ध्वस्त करू नका, असे पत्नीने सांगताच पतीचा राग अनावर झाला. त्यामुळे त्याने घरातच असलेले विषारी औषध पिऊन जीवन संपवल्याची घटना घडली आहे. अरविंद लोहार असे मृत व्यक्तीचे नाव आहे. या घटनेमुळे परिसरात खळबळ उडाली आहे.

नेमकं काय घडलं?

पोलिसांनी दिलेल्या माहितीनुसार, मृत अरविंद लोहार यांना गेल्या अनेक वर्षांपासून दारूचे प्रचंड व्यसन जडले होते. ते रोज दारू पिऊन घरी येत असल्याने घरात आर्थिक चणचण आणि सतत मानसिक तणावाचे वातावरण असायचे. अरविंद यांच्या या व्यसनाला त्यांचे कुटुंब आणि विशेषतः त्यांची पत्नी पूर्णपणे कंटाळली होती. संसार वाचवण्यासाठी आणि पतीचे आरोग्य सुधारावे म्हणून पत्नी त्यांना वारंवार दारू सोडण्याचा सल्ला देत असे.

अरविंद हे पुन्हा एकदा दारू पिण्याच्या तयारीत होते. त्यांना दारू पिताना पाहताच पत्नीचा संयम सुटला आणि तिने त्यांना आज दारू पिऊ नका असे म्हणत सक्त विरोध केला. याच गोष्टीवरून दोघांमध्ये नेहमीप्रमाणे कडाक्याचे भांडण झाले. मात्र, यावेळी अरविंद यांचा राग अनावर झाला. पत्नीने आपल्याला दारू पिण्यापासून रोखल्याचा राग सहन न झाल्याने त्यांनी घरातच ठेवलेले ढेकूण मारण्याचे विषारी औषध घेतले.

औषध प्राशन केल्यानंतर काहीच मिनिटांत अरविंद यांना तीव्र वेदना होऊ लागल्या आणि ते जमिनीवर कोसळले. पतीने विष प्यायल्याचे लक्षात येताच पत्नीने आरडाओरडा केला. आवाजाने आजूबाजूचे शेजारी तातडीने मदतीला धावून आले. अरविंद यांना शेजाऱ्यांच्या मदतीने तातडीने पिंपरी-चिंचवड महानगरपालिकेच्या थेरगाव येथील रुग्णालयात दाखल करण्यात आले. रुग्णालयातील डॉक्टरांनी तातडीने आयसीयू (ICU) मध्ये त्यांच्यावर उपचार सुरू केले. मात्र, विष शरीरात वेगाने पसरल्यामुळे त्यांची प्रकृती ढासळत गेली. दुर्दैवाने उपचारादरम्यान त्यांचा मृत्यू झाला.

चिंचवड पोलिसांकडून तपास सुरू

या घटनेची माहिती मिळताच चिंचवड पोलीस ठाण्याचे अधिकारी आणि अंमलदार यांनी थेरगाव रुग्णालयात धाव घेतली. पोलिसांनी मृतदेहाचा पंचनामा करून तो शवविच्छेदनासाठी पाठवला आहे. प्राथमिक माहितीच्या आधारे पोलिसांनी सध्या ‘आकस्मिक मृत्यू’ची (ADR) नोंद केली आहे. अरविंद लोहार यांनी हे पाऊल केवळ रागाच्या भरात उचलले की यामागे आणखी काही कौटुंबिक कारणे होती, याचा सखोल तपास चिंचवड पोलीस करत आहेत.