चौकशी काय, संजय गायकवाडांना थेट अटक करा..; कोर्टाच्या आदेशानंतर प्रशांत आंबी स्पष्टच बोलले..

कॉम्रेड गोविंद पानसरे लिखित ‘शिवाजी कोण होता’ या पुस्तकाचे प्रकाशक प्रशांत आंबी यांना शिवीगाळ केल्याप्रकरणी आणि धमकावल्याप्रकरणी शिवसेना शिंदे गटाचे आमदार संजय गायकवाड यांना न्यायालयाने झटका दिला आहे. संजय गायकवाड यांच्या पोलीस चौकशीला न्यायालयाकडून परवानगी देण्यात आली आहे. प्रशांत आंबी यांनी कोल्हापूरमधील राजारामपुरी पोलीस ठाण्यात गायकवाडांविरोधात तक्रार दाखल केली होती. त्यावेळी पोलिसांनी गुन्हा नोंदवण्यास नकार दिला होता. मात्र आता न्यायालयाने चौकशीची परवानगी दिल्याने गायकवाडांच्या अडचणी वाढणार आहेत. याप्रकरणी प्रशांत आंबी यांनी पहिली प्रतिक्रिया दिली आहे. “गेल्या अनेक दिवसांपासून मी दखलपात्र स्वरुपाची कलमं दाखल होण्यासाठी संघर्ष करत होतो. त्यामुळे न्यायालयाचे मी आभार मानतो. पोलिसांनी नि:पक्षपातीपणे तपासण करणं अपेक्षित आहे. पोलीस पानसरेंनाही न्याय देऊ शकले नाहीत”, असं ते म्हणाले.

“संजय गायकवाड यांनी त्यांचा गुन्हा कबूल केला आहे. त्यांचा ऑडिओ असल्याने आता चौकशी काय करणार? माझी राजारामपुरी पोलिसांना विनंती आहे की त्यांनी थेट गायकवाडांना अटक करावी. आमदार संजय गायकवाड यांच्यावर कोणतीही कारवाई न झाल्याने त्यांच्या कार्यकर्त्यांचं धाडस वाढलं आहेत. मीडियाने प्रकरण उचलून धरल्यापासून धमक्यांना सुरु झाली आहे. गायकवाडांच्या समर्थकांकडून मला धमक्या दिल्या जात आहेत, शिवीगाळ केली जात आहे. कुठे फिरतो, कुठे उठतो-बसतो या सगळ्या गोष्टींवर आम्ही लक्ष ठेवून असल्याची धमकी मला मिळाली.  न्यायालयाने चौकशीची परवानगी दिली तरी पुढे काय होईल, हे मला माहीत नाही. परंतु जोवर कठोर कारवाई होत नाही, तोवर ही लढाई सुरू राहील,” असे आरोप आंबी यांनी केले आहेत.

‘शिवाजी कोण होता’ या पुस्तकावरून संजय गायकवाड यांनी फोन करून प्रशांत आंबी यांना प्रचंड शिवीगाळ केली होती. तसंच पुस्तक छापल्यास घरी येऊन मारेन, अशी धमकीही त्यांनी दिली होती. संजय गायकवाड यांच्या या फोन संभाषणाची क्लिप सोशल मीडियावर व्हायरल झाली होती. त्यानंतर प्रचंड गदारोळ झाला होता.