पुण्यातील बिल्डर आत्महत्या प्रकरणी मोठी अपडेट; पोलिसांच्या हाती लागला महत्वाचा पुरावा, पोलीस उपायुक्तांनी नेमकं काय सांगितलं?

पुण्यातील गुलटेकडी परिसरात राहणारे बिल्डर खलील शेख यांनी आत्महत्या केल्याने एकच खळबळ उडाली आहे. खलील शेख यांनी आत्महत्या करण्याआधी चिठ्ठी लिहिली. तसेच एक व्हिडिओ बनवल्याची माहिती समोर आली आहे. हा व्हिडिओ आणि आत्महत्येपूर्वी लिहिलेली चिठ्ठी पोलिसांच्या हाती लागली आहे. यात बिल्डर शेख यांनी गंभीर आरोप केले आहेत. पोलीस उपायुक्त मिलिंद मोहिते यांनी या प्रकरणी महत्त्वाची अपडेट दिली आहे. तसेच या प्रकरणातील आरोपींना अटक देखील होऊ शकते, अशी शक्यता त्यांनी व्यक्त केली आहे.

पोलिसांकडून 14 जणांच्या विरोधात गुन्हा

बिल्डर शेख आत्महत्या प्रकरणात माजी आमदार आणि नगरसेवकासह 14 जणांच्या विरोधात गुन्हे दाखल करण्यात आले आहेत. गुन्हा दाखल झाल्यानंतर आत्महत्येआधी लिहिलेली चिठ्ठी, व्हिडिओ आणि संबंधित आर्थिक कागदपत्रे देखील ताब्यात घेतली आहे. आता या प्रकरणी आरोपींची चौकशी देखील केली जाणार आहे. या प्रकरणावर पुण्याचे पोलीस उपायुक्त मिलिंद मोहिते म्हणाले, ‘ पुण्यातील बिल्डर आत्महत्या प्रकरणात 14 जणांच्या विरोधात गुन्हा दाखल केला आहे. हा गुन्हा गंभीर स्वरुपाचा आहे. पोलीस सगळ्याच बाजूने तपास करत आहे. या प्रकरणी योग्य ती कारवाई केली जाईल’.

बिल्डरचं किती रुपयांचं बील थकलं होतं?

बिल्डरचं किती रुपयांचं बिल थकलं होतं, यावर बोलताना पोलीस उपायुक्त मिलिंद मोहिते म्हणाले, ‘आत्महत्येपूर्वी लिहिलेल्या चिठ्ठीत आणि व्हिडिओमध्ये त्यांनी अडीच कोटी रुपये थकीत असल्याचे म्हटलं आहे. पुढील तपासात सर्व गोष्टी समोर येतील. त्यांचा व्यवहार कसा होता, त्या अनुषंगाने काय फसवणूक केलेली आहे, हे समोर येईल.

बिल्डर शेख यांच्या प्रकल्पात किती पार्टनर होते, यावर पोलीस उपायुक्त मोहिते म्हणाले, ‘या प्रकरणी रात्रीच गुन्हा दाखल झालेला आहे. तपासानंतर या गोष्टी समोर येतील’. तर अटकेच्या कारवाईवर म्हणाले, ‘ हा गंभीर गुन्हा आहे. यात जवळपास दहा वर्षांची शिक्षा आहे. त्यामुळे योग्य दृष्टीने तपास होईल. अटकेची कारवाई देखील करावी लागेल’.