Pune News : पुणे शहरात बसमधून करा मोफत प्रवास, काय आहे योजना?

पुणे | 31 ऑगस्ट 2023 : पुणे शहर देशातील टॉप १० मध्ये असलेले शहर आहे. या शहरातील नागरिकांसाठी अनेक पायाभूत सुविधा निर्माण केल्या जात आहेत. राज्य आणि केंद्र सरकारने पुणे शहराला मेट्रोची भेट दिली. पुणे शहरातील नागरिकांनी या मेट्रोला चांगलाच प्रतिसाद दिला. यामुळे आता मेट्रोचा विस्तार आणखी वाढणार आहे. त्याचवेळी बस प्रवास अधिक चांगला करण्यासाठी पुणे महानगर परिवहन महामंडळाकडून (पीएमपी) आणि पुणे तसेच पिंपरी चिंचवड मनपाकडून निर्णय घेण्यात आला आहे. यामुळे बसमधील प्रवास मोफत होणार आहे.

काय आहे योजना

पुणे आणि पिंपरी चिंचवड शहरात मेट्रोने प्रवास करणाऱ्या प्रवाशांसाठी पीएमपीएमएलकडून मोफत प्रवासाची योजना आणली आहे. मेट्रोचे तिकीट दाखवल्यानंतर प्रवाशांना पीएमपीएलमधून मोफत बस प्रवास करता येणार आहे. पीएमपीएलच्या इलेक्ट्रिक बसच्या माध्यमातून प्रवाशांना ही सुविधा देण्यात येणार आहे. मेट्रो स्टेशनच्या 3 ते 4 किलोमीटरच्या परिसरात मोफत बस सेवा देण्यात येणार आहे. पुणे महानगरपालिका आयुक्त विक्रमकुमार यांनी ही माहिती दिली.

आणखी बस खरेदी करणार

पुणे शहरातील सुमारे दोन लाख पुणेकर पीएमपीएमएल बसमधून प्रवास करतात. ‘पीएमपीएमएल’कडे असणाऱ्या सध्याच्या बसेसपैकी काही बसचे आयुष्य संपलेले आहे. त्यासाठी नवीन बसेस घेण्यात येणार आहे. पुणे आणि पिंपरी चिंचवड शहरासाठी ६५० बस टप्पाटप्याने घेण्यात येणार आहेत. त्यातून ऑगस्ट महिन्यात १९२ बसेस दाखल येत आहे. मेट्रोचा प्रवास करणाऱ्या नागरिकांना बस सेवा मोफत देण्यासाठी या बसेसचा वापर होणार आहे. त्यासाठी पीएमपीएल नव्याने 300 इलेक्ट्रिक बस खरेदी करणार आहे.

दोन्ही मनपाकडून मंजुरी

पुणे आणि पिंपरी चिंचवड महानगरपालिकेकडून नवीन बसेस सुरु करण्याच्या योजनेला मंजुरी दिली आहे. यामुळे मोफत बसप्रवास प्रवाशांचा लवकरच सुरु होणार आहे. परंतु ही सेवा नेमकी कधी सुरु होणार आहे? त्यासंदर्भात तारीख जाहीर केली गेली नाही. या योजनेसाठी मेट्रो स्टेशनला तीन ते चार बस दिल्या जाणार आहेत. या बस संबंधित स्टेशनच्या परिसरात निश्चित केलेल्या मार्गांवरून जाता येणार आहे. मेट्रोचे तिकिट नसणाऱ्या प्रवाशांना या बसमधून प्रवास करता येईल. परंतु त्यांना तिकिटाचे पैसे द्यावे लागतील.