पुणे विधानसभेसाठी शरद पवार यांच्या राष्ट्रवादी काँग्रेसचा उमेदवार ठरला, तयारीला लागण्याचे कोणाला दिले आदेश
Sharad Pawar NCP : राज्य विधानसभा निवडणुकीला मोठा कालावधी आहे. परंतु राज्यातील विविध पक्षाकडून तयारी सुरु करण्यात आली आहे. पुणे जिल्ह्यात शरद पवार यांच्या राष्ट्रवादी काँग्रेसकडून तयार केली जात आहे...
पुणे | 11 सप्टेंबर 2023 : राज्यातील विधानसभा निवडणुका लोकसभा निवडणुकीनंतर होणार आहे. या निवडणुकांना अजून वर्षभराचा कालावधी आहे. परंतु विविध राजकीय पक्षांनी निवडणुकीची तयारी सुरु केली आहे. भारतीय जनता पक्षाकडून आमदारांच्या कामगिरीचा आढावा घेतला जात आहे. त्याचवेळी शरद पवार यांच्या राष्ट्रवादी काँग्रेसकडून पुणे शहरातील विधानसभा मतदार संघाची तयारी केली जात आहे. त्यासाठी उमेदवारची चाचपणी केली जात आहे. हडपसर विधानसभा मतदार संघातील उमेदवार राष्ट्रवादीकडून ठरल्याची माहिती सूत्रांनी दिली.
शरद पवार गटाकडून जोरदार तयारी
राष्ट्रवादी काँग्रेसमधील बंडानंतर शरद पवार चांगले आक्रमक झाले आहेत. राज्यात सर्वत्र शरद पवार यांचा सभा होत आहेत. त्यानंतर आता अजित पवार यांनीही उत्तर सभा घेणे सुरु केले आहे. रविवारी अजित पवार यांनी कोल्हापुरात उत्तर सभा घेतली. राष्ट्रवादी काँग्रेसचा गड असणाऱ्या पुणे शहरात विधानसभेची तयारी शरद पवार करत आहे. त्यासाठी संभाव्य उमेदवारांची आतापासूनच चाचपणी सुरू आहे.
कोणाला दिले तयारीचे आदेश
राष्ट्रवादी काँग्रेस शरद पवार गटाने आतापासूनच विधानसभा निवडणुकीच्या तयारीला सुरुवात केली आहे. राष्ट्रवादी काँग्रेसचे शरद पवार गटाचे शहराध्यक्ष प्रशांत जगताप हडपसर मतदारसंघातील उमेदवार असण्याची शक्यता वर्तवली जात आहे. प्रशांत जगताप यांना विधानसभेच्या तयारीला लागण्याचे आदेश वरिष्ठ स्तरावरून दिल्याची माहिती सूत्रांनी दिली. महाविकास आघाडीचे जागा वाटप ठरले नसतानाही प्रशांत जगताप यांना तयारी करण्याचे आदेश शरद पवार यांच्याकडून दिल्याचे वृत्त आहे. यामुळे हडपसरची जागा शरद पवार गटाकडेच जाण्याची शक्यता आहे.
अपात्रसाठी यादी निवडणूक आयोगाकडे
राष्ट्रवादी काँग्रेस शरद पवार गटाने केंद्रीय निवडणूक आयोगाकडे अपात्र आमदारांसाठी यादी पाठवली आहे. या यादीत पुण्यातील दोन आमदारांचा समावेश आहे. सुनील टिंगरे आणि चेतन तुपे यांच्या नावाचा समावेश अपात्र ठरलेल्या आमदारांच्या यादीत समावेश आहे. चेतन तुपे यांनी भूमिका अजूनही स्पष्ट केली नाही. मात्र ते अजित पवार यांच्यासोबत असल्याने अपात्रतेची कारवाई त्यांच्यावर होत आहे.
