Pune accident | वरंध घाटात मोठी दुर्घटना, बस 50 फूट खोल दरीत कोसळली अन्…
pune accident news | पुणे शहरातून कोकणाकडे जाणाऱ्या वरंध घाटात मोठी दुर्घटना घडली. या घाटात ५० फूट खोल दरीत मिनी बस कोसळली. मिनी बस पुण्याहून वरंध घाट मार्गे चिपळूणकडे जात असताना हा अपघात झाला.
विनय जगताप, वेल्हा, पुणे | 8 ऑक्टोंबर 2023 : पुणे शहराजवळील वरंध घाटात शनिवारी मध्यरात्री मोठी दुर्घटना घडली. भोर-महाड मार्गावरील असणाऱ्या घाटात खासगी मिनी बस एका वळणावर दरीत कोसळली. यामुळे रात्री झोपेत असलेल्या प्रवाशांना हादरे बसले. अचानक काय घडले, त्याची कल्पना येण्यापूर्वीच बस दरीत कोसळली. त्यावेळी बसमधील प्रवाशी प्रचंड घाबरले. खाली नीरा देवधर धरण होते. त्या धरणात बस पडण्यापूर्वी झाडा-झुडपांमध्ये अडकल्यामुळे पुढील अनर्थ टळला. परंतु या घटनेत एका जणाचा मृत्यू झाला.
कसा घडला अपघात
पुणे येथील स्वारगेटवरुन भोरमार्गे खासगी 17 सीटर बस (MH 08 AP1530)कोकणात जात होती. शनिवारी रात्री दोन वाजता बस वरंध घाटात होती. त्यावेळी वळणावर बस चालक अजिंक्य कोलते याचे नियंत्रण सुटले. त्यानंतर नीरा देवघर धरणाच्या बॅक वॉटर परिसरात 50 फूट खोल दरीत बस कोसळली. बस झाडांमध्ये अडकल्यामुळे मोठी दुर्घटना टळली. ही बस धरणाच्या पाण्यात गेली असती तर अनर्थ झाला असता. बसमधील 10 ही जणांना सुखरूप बाहेर काढण्यात यश आले.
स्थानिकांची घटनास्थळी धाव
अपघाताच्या घटनेची माहिती मिळताच स्थानिक नागरिकांनी आणि पोलिसांनी घटनास्थळी धाव घेतली. गाडीतील प्रवाशांना सुखरूप बाहेर काढले. बसमधील प्रवाशांना भोरच्या उपजिल्हा रुग्णालयात करण्यात आले. घाटातील एका वळणावर चालकाचे बसवरील नियंत्रण सुटल्यामुळे अपघात झाल्याचा प्राथमिक अंदाज आहे.
धरण पाच फुटांवर होते…
बस कोसळून झाडाझुडपात अडकली. त्या ठिकाणाहून नीरा देवघर धरण अवघ्या 5 फुटांवर होते. बस अडकली नसती तर मोठी दुघर्टना घडली असती. बस अडकल्यानंतर स्थानिक तरुणांनी जीवाची बाजी लावून सर्वांना बाहेर काढले. या घटनेत चालक अजिंक्य संजय कोलते (राहणार धनकवडी, पुणे) यांचा मृत्यू झाला आहे. भोर उपजिल्हा रुग्णालयात उपचारा दरम्यान त्यांचा मृत्यू झाला. तसेच राजेंद्र लाला मिसाळ (राहणार पद्मावती, पुणे), रमेश तुकाराम महाडिक (राहणार, पुणे), सुभाष कदम राहणार (रा. पुणे), करिष्मा उत्तम कांबळे (राहणार सिंहगड रोड पुणे) यांच्यावर उपचार सुरू आहेत.
