Tv9 मराठी स्पेशल रिपोर्ट | पुण्यातील पेठांनी भाजपकडे पाठ फिरवली, आकडे समोर
कसबा निकालावरुन अजूनही विरोधक आणि सत्ताधाऱ्यांमध्ये आरोप प्रत्यारोप सुरु आहेत. दरम्यान मतदानाच्या आकडेवारीवरुन पेठांमधले मतदार 2019 प्रमाणे भाजपसोबत राहिले नाहीत. हे आकडेवारी सप्ष्ट झाल्याचं बोललं जातंय.
पुणे : जिथं दिग्गजांची प्रतिष्ठा पणावर होती, तिथं निकालानंतर राजकारण विसरुन रविंद्र धंगेकरांनी केलेल्या कृतीचं कौतुक होतंय. सध्या नेतेमंडळी एकमेकांशी वैऱ्यासारखे वागतायत. पण विजयानंतर रविंद्र धंगेकर आधी दिवंगत आमदार मुक्ता टिळकांच्या घरी गेले. टिळकांच्या फोटोला नमस्कार करुन त्यांनी कुटुंबियांची भेट घेतली. त्यानंतर रुग्णालयात जाऊन भाजप खासदार गिरीश बापटांची भेट घेऊन त्यांचे आशीर्वाद घेतले. इकडे निकालावरुन सत्ताधारी विरोधकांमध्ये दावे-प्रतिदावे सुरु आहेत. कसब्यातला पराभव हा सरकारविरोधातला रोष असल्याचं राऊत म्हणतायत. तर भाजप नेते सुधीर मुनंगटीवारांनी पराभवाबद्दल चिंतनाची गरज व्यक्त केलीय. दरम्यान केंद्रीय मंत्री नितीन गडकरींच्या नावानं सोशल मीडियात व्हायरल झालेली एक पोस्टही चर्चेत राहिली.
दाव्याप्रमाणे गडकरी असं म्हणतायत की कसब्यात निवडणूक ही आत्मचिंतन करण्याची वेळ आहे. खरंच फडणवीसांनी शिंदेंना सोबत घेऊन चूक तर केली नाही ना? जनता विश्वासघात खपवून घेत नाही. मात्र ही पोस्ट सपशेल खोटी आहे. गडकरींनी अशी प्रतिक्रिया दिलेली नाही. त्यामुळे ही पोस्ट नेमकी कुणी व्हायरल केली, त्याचा स्रोत काय होता? याच्या चौकशीसाठी गुन्हा दाखल करण्यात आलाय.
पेठांमधून दोन्ही उमेदवारांना किती-किती मते मिळाली?
दुसरीकडे पेठांमधला पारंपरिक मतदार दूर गेल्यामुळे भाजपला फटका बसल्याचं आकडेवारी सांगतेय. एकट्या शनिवार आणि सदाशिव पेठेतून भाजपच्या धंगेकरांना लीड मिळालं, मात्र ते गेल्यावेळच्या तुलनेत कमी होतं.
सदाशिव आणि शनिवार पेठेतून रासनेंना 21763 तर धंगेकरांना 14557 मतदान मिळालं. रासनेंचं 7206 मतांचं लीड राहिलं. कसबा आणि सोमवार पेठेत रासनेंना 6033, धंगेकरांना 10594 मतं मिळाली. म्हणजेच धंगेकरांना 4561 मतांचं लीड मिळालं. रास्ता पेठ आणि रविवार पेठेत रासनेंना 10639, धंगेकरांना 16714 मतं मिळाली. त्यामुळे धंगेकरांचं इथे 6075 मतांचं लीड राहिलं. नवी पेठ-पर्वतीमधून रासनेंना 8498, धंगेकरांना मिळाली 10176 मतं मिळाली. म्हणजे धंगेकरांना इथे 1678 मतांचं लीड मिळालंय
सदाशिव आणि शनिवार पेठेत गेल्यावेळी मुक्ता टिळकांना 20 हजारांहून जास्तीचा लीड होता. त्यापैकी रासने फक्त 7206 च मतं मिळवू शकले. तूर्तास निवडणूक झाली असली तरी कसब्यावरुन आरोप-प्रत्यारोपांची मालिका सुरुच आहे.
