Mobile : मोबाईलचा हट्ट आला जीवाशी; परिस्थितीमुळे पतीला झाला हतबल, इकडे पत्नीने उचललं टोकाचं पाऊल

सध्या सोशल मीडियाचा जमाना आहे. प्रत्येकाला रील्सचे, पोस्टचे फॅड लागले आहे. ज्याला त्याला रील स्टार व्हायचे आहे. एकदम भारी स्मार्टफोन हाती असावा आणि तो मिरवावा अशी अनेकांची इच्छा असते. अबालांपासून वयोवृद्धापर्यंत अनेकांना मोबाईलच्या व्यसनाने पछाडले आहे. काही जण आपल्या स्वभावाला आणि भावनेला मुरड घालतात. पण काही जण टोकाचे पाऊल टाकतात. मोबाईलचा हट्ट न पुरवल्याने एका पत्नीने टोकाचं पाऊल उचलल्याची घटना घडली आहे. त्यामुळे पतीला जबर धक्का बसला आहे.

मोबाईलचा हट्ट न पुरवल्यामुळे पिंपरी- चिंचवड मध्ये पत्नीने गळफास घेऊन आत्महत्या केल्याची धक्कादायक घटना उजेडात आली आहे. शिवानी गोपाल शर्मा अस आत्महत्या केलेल्या विवाहित महिलेचे नाव आहे. गेले काही दिवसांपासून शिवानी पतीकडे मोबाईलचा हट्ट करत होती. परंतु, पतीची आर्थिक परिस्थिती बिकट असल्याने तो मोबाईल घेऊ शकत नव्हता. तरीही पती प्रयत्न करत होता. परंतु, या हट्टापायी शिवानीने गळफास घेऊन आत्महत्या केली.

शिवानी ही अवघ्या 20 वर्षांची होती. लग्न होऊन काही दिवस झाल्यानंतर तिने पतीकडे स्मार्टफोन घेण्यासाठी तगादा लागला. पती गोपाल हा एका खासगी कंपनीत कामाला आहे. पैशांच्या अडचणीमुळे तो मोबाईल खरेदी करु शकत नव्हता. पण तरीही तो पत्नीचा हट्ट पुरवण्यासाठी प्रयत्न करत होता. आपण घरी एकटेच असतो, त्यामुळे आपल्याला मोबाईल खरेदी करुन द्यावा असा हट्ट ती सारखा धरत होती. हा हट्ट पूर्ण न झाल्याने बुधवारी शिवानीने गळफास घेऊन आत्महत्या केली. पती जेव्हा नोकरीवरुन घरी आला. तेव्हा त्याला हादराच बसला. वाकड पोलिसांनी याविषयी चौकशी केल्यानंतर मोबाईलच्या हट्टासाठी तिने टोकाचे पाऊल उचल्याचे समोर आले.

ती वाचावी यासाठी धावाधाव

पती गोपाल नोकरीवरुन घरी आला. त्याने दरवाजा लोटताच पत्नीने गळफास घेतल्याचे त्याच्या लक्षात आले. त्याने आरडाओरड करत शेजाऱ्यांना बोलावले. पत्नीला वाचवण्यासाठी त्याने लागलीच जवळच्या दवाखान्यात धाव घेतली. पत्नी वाचेल असे त्याला वाटत होते. पण त्याची ही अखेरची धावाधाव कामी आली नाही. डॉक्टरांनी पत्नीला तपासून मृत घोषीत केले.