लिंगपिसाट खरातसोबत राजकीय लोकांचेही व्हिडीओ? रोहित पवार यांची धक्कादायक माहिती; काय केली मागणी?

नाशिक येथील भोंदूबाबा अशोक खरात प्रकरणाने राज्यात खळबळ माजली होती. अशोक खरातने अनेक महिलांवर लैंगिक अत्याचार केले. त्याचे महिलांसोबत नको ते कृत्य करतानाचे व्हिडीओ सोशल मीडियावर व्हायरल झाले. अशोक खरताविरोधात अनेक तक्रारी दाखल झाल्या. त्यानंतर आता त्याची SIT चौकशी सुरु आहे. दरम्यान, या प्रकरणावर राजकीय वर्तुळातूनही अनेक प्रतिक्रिया आल्या. राष्ट्रवादी काँग्रेस (शरदचंद्र पवार) पक्षाचे नेते रोहित पवार यांनी धक्कादायक माहिती समोर आणली आहे.

रोहित पवार यांनी नाशिकमधील प्रकरणात धक्कादायक खुलासा केला आहे. त्यांनी सांगितले की, या प्रकरणात केवळ सामान्य लोक किंवा अराजकीय व्यक्तींचे नव्हे तर राजकीय नेत्यांचेही व्हिडीओ आहेत. “खरातसोबत राजकीय लोकांचेही व्हिडीओ आहेत का?” असा प्रश्न उपस्थित करत रोहित पवार यांनी संपूर्ण प्रकरणाची निष्पक्ष चौकशी करण्याची मागणी केली आहे.

रोहित पवार म्हणाले की, “नाशिकमध्ये ३५ हनी ट्रॅप प्रकरणे समोर आली. त्यात काय कारवाई झाली? संबंधित अधिकाऱ्यांवर दबाव आणला गेला का? काही अधिकाऱ्यांना गप्प केले गेले का? हे व्हिडीओ बाहेर कसे आले? हे सामान्य लोकांचे व्हिडीओ आहेत असे सांगितले जाते, पण खरंतर यात राजकीय लोकांचे व्हिडीओ आहेत. कुणाचे आहेत, कोण कोण त्यांच्यासोबत होते, हे सर्व उघडपणे समोर यायला हवे.”

‘सगळ्यांची चौकशी व्हायला हवी’

रोहित पवार यांनी भाजपवर गंभीर आरोप करत म्हटले की, “भाजप नेहमी आपल्या मित्र पक्षांना संपवण्यासाठी असे प्रकार करते. नितीश कुमारचे काय झाले? साताऱ्यात काय चालले आहे?” त्यांनी पुढे सांगितले की, “आता जर चौकशी करायची असेल तर सगळ्यांची करा. सर्व नेत्यांची चौकशी झाली व्हायला पाहिजे. त्या गेल्या पण इतर लोक का बाहेर येत नाही. एसआयटीचा चुकीचा वापर लोक करत असतील, काही लपवत असतील, काही नेते म्हणत आहेत की आमच्या लोकांचे व्हिडीओ पुढे येऊ देऊ नका.. एसआयटीचा वापर सिस्टीन क्लियर करण्यासाठी करा.”

खरातच्या जमिनी विकून विद्यार्थ्यांसाठी वापरा

रोहित पवार यांनी खरातच्या जमिनींच्या मुद्द्यावरही आक्रमक भूमिका घेतली. ते म्हणाले, “खरातच्या जमिनी विका आणि विद्यार्थ्यांच्या शिक्षणासाठी वापरा… पण लवकर करा.”

समृद्धी मार्गातील भ्रष्टाचाराचा आरोप

समृद्धी महामार्गाच्या जमिनी खरेदीप्रकरणातही रोहित पवार यांनी राजकीय नेत्यांवर आरोप केले. ते म्हणाले, “समुद्धी मार्ग कसा जाणार हे माहिती असल्याने काही राजकिय लोकांनी जमिनी घेतल्या. खरातला आतून माहिती मिळाली त्यामुळे भोंदूबाबाचाही फायदा झाला. खऱ्या शेतकऱ्याचा या समृद्धी महामार्गाला विरोध होता. आता जे खरे शेतकरी आहेत त्यांचा शक्ती मार्गावर विरोध आहे”

रोहित पवार यांच्या या विधानांनी नाशिक हनी ट्रॅप प्रकरणाला नवे वळण आले आहे. SITच्या चौकशीत सर्व राजकीय नेत्यांचा समावेश करावा आणि सर्व व्हिडीओ सार्वजनिक करावेत, अशी मागणी आता जोर धरू लागली आहे.